पोखरा (हाम्रो खेलकुद) – १३ औं दक्षिण एसियाली खेलकुद (साग) अन्तर्गत बिच भलिबल प्रतियोगितामा शनिबार नेपालको टिमले मिश्रित परिणाम ल्याएको छ । पोखराको लेकसाइडमा रहेको बाराही मैदानमा भएको खेलमा पुरुष टिमले एक जित र ३ हार बेहोरे ।

नेपालका मानबहादुर श्रेष्ठ र दिल सुनारको जोडीले माल्दिभ्सका अब्दुल्ला जायन र अहमद मोहम्मदको जोडीमाथि २१–१६ र २१–१७ को जित निकाल्यो । अर्को खेलमा यो जोडी पाकिस्तानसँग २१–१९, १५–२१ र १०–१५ को सेटमा पराजित भयो । राजु विक र सन्जु शाहको जोडी माल्दिभ्सको एडम नसीम र मोहम्मद अलिको जोडीसँग १९–२१, २१–१८ र १५–८ को प्रतिस्पर्धात्मक सेटमा पराजित हुन पुग्यो । यही जोडी श्रीलंकाको जोडीसँग २१–१५ र २१–१० को सेटमा पराजित भयो ।

लिग चरणको खेलमा हालसम्म पुरुषतर्फ समूह ‘ए’ मा श्रीलंकाका इन्डिका टिरोन र जयन सनुजाको जोडी ८ अंकसहित शीर्ष स्थानमा छ । पाकिस्तानको जस्नव खान र अफाख खानको जोडी ७ अंकसहित दोस्रो र मानबहादुर श्रेष्ठ र दिल सुनारको जोडी ६ अंकसहित तेस्रो स्थानमा छन् । समूह ‘बी’ तर्फ श्रीलंकाकै प्रदीप असंका र असेन कुमाराको जोडीले ८ अंकसहित शीर्ष स्थान ओगटेको छ । पाकिस्तानका मोहम्मद रज्जाक र वसीन मोहम्मदको जोडी ६ अंकसहित दोस्रो स्थानमा छ । नेपालको राजु विक र सन्जु शाहको जोडी ५ अंकसहित चौथो स्थानमा छ ।

महिलातर्फ शनिबार नेपालले विश्रामा पाएको थियो । तीन देशमात्रै सहभागी महिलातर्फ समूह ‘ए’ र ‘बी’ दुवैमा श्रीलंकाका टिम शीर्ष स्थानमा छन् । नेपालका विनिता बुढाथोकी र नेविका चौधरीको जोडी समूह ‘ए’ र कोपिला उप्रेती र मनीषा चौधरीको जोडी समूह ‘बी’ मा दोस्रो स्थानमा छन् ।