पोखरा (हाम्रो खेलकुद)- १३ औं दक्षिण एसियाली खेलकुद (साग)अन्तर्गत नेपाल महिला हृयाण्डबलको फाइनलमा प्रवेश गरेको छ ।

पोखरा रंगशालाको हृयाण्डबल कोर्टमा शनिबार भएको सेमिफाइनल खेलमा पाकिस्तानलाई २२–२१ गोलअन्तरले पराजित गर्दै फाइनलमा प्रवेश गरेको हो ।

निकै प्रतिस्पर्धात्मक खेलमा नेपाल १७–१९ गोलले पछि परेको अवस्थामा अन्तिम समयमा २०–२० गोलबराबरी गर्दै २२–२१ गोलअन्तरले विजयी भएको थियो । नेपालको लागि उमा राईले सर्वाधिक ११ गोल गरिनभने कला राईले ४ र निशा राई र कविता राईले समान २–२ गोल गरे । यस्तै रामकुमारी चौधरी, रन्जना राई र बन्दना राईले समान १–१ गोल गरेका थिए ।

पहिलो हाफमा ८–११ गोलअन्तरले पछाडि परेको नेपालले अन्तिम समयमा पुनरागमन गर्दै पदक पक्का गरेको हो । नेपालले स्वर्ण पदकको लागि फाइनलमा भारतसँग खेल्ने छ ।

आजै भएको पहिलो सेमिफाइनल खेलमा भारतले बंगादेशलाई ४१–१३ गोलअन्तरले पराजित गर्दै फाइनलमा प्रवेश गरिसकेको हो ।
साग खेलको महिला हृयाण्डबलमा नेपाल पहिलो पटक फाइनलमा प्रवेश गरेको हो । नेपालले समुह विजेता बन्दै समेमिफाइनलमा प्रवेश गरेको थियो ।

१२ औं संस्करणकै साग गेमको सेमिफाइनलमा नेपाली महिला टोली बंगलादेशसँग हारेको थियो । तेस्रो स्थानको लागि भएको खेलमा नेपाल पाकिस्तानसँग हार्दै पदकविहीन बनेको थियो ।