पोखरा (हाम्रो खेलकुद) – १३ औं दक्षिण एसियाली खेलकुद (साग) अन्तर्गत बिच भलिबलमा शुक्रबार भने नेपाली टोलीले सुखद नतिजा निकालेका छन् । पुरुष र महिलातर्फका २/२ टोलीले नै जित हासिल गरेका छन् ।

फेवाताल किनारको बाराही मैदानमा भएको मानबहादुर श्रेष्ठ र दिल सुनारको जोडीले शुक्रबार बंगलादेशका शेख मोहम्मद साने र हैदर मोहम्मद इमरानको जोडीलाई २१–१५ र २१–१८ ले हरायो । राजु विक र सञ्जु शाहको जोडीले बंगलादेशको मोहम्मद मोनिर हुसैन र मोहम्मद अलि शाहजहाँको जोडीलाई २२–२० र २१–१६ ले पराजित गर्यो ।

महिलातर्फ नेपालका विनिता बुढाथोकी र नेविका चौधरीको जोडीले माल्दिभ्सका रसिदा अमिनाथ र साफ्ना इब्राहिमको जोडीलाई २१–५ र २१–६ ले हरायो । खुट्टाको चोटका बावजुद पनि नेविका चौधरीले उत्कृष्ट प्रदर्शन गरिन् । नेपालकै कोपिला उप्रेती र मनीषा चौधरीको जोडीले माल्दिभ्सकै जिनिया मोसा फातिमाथ र रुदाइना अमिनाथको जोडीलाई २१–१२ र २१–१२ को पराजित गर्यो ।

शुक्रबार पहिलो खेलमा बंगलादेशका शेख मोहम्मन साने र हैदर मोहम्मद इमरानको जोडी श्रीलंकाको इन्डिका टिरोन र जयन सनुजाको जोडी १३–२१ र १७–२१ ले पराजित भयो । माल्दिभ्सका अब्दुल्ला जायन र अहमद मोहम्मदको जोडी पाकिस्तानको जस्नव खान र अफाख खानको जोडीसँग १८–२१ र १३–२१ ल हार ब्यहो¥यो ।

बंगलादेशको मोहम्मद मोनिर हुसैन र मोहम्मद शाहजहाँ अलिको जोडी श्रीलंकाको प्रदीप असंका र अशेन कुमाराको जोडीसँग १८–२१ र ११–२१ ले पराजित बन्यो । माल्दिभ्सको एडम नसीम र मोहम्मद अलिको जोडीले पाकिस्तानको मोहम्मद रज्जाक र वसीन मोहम्मदको जोडीलाई २१–१९ र २१–१७ ले हराउन सफल भयो ।

श्रीलंकाका इन्डिका टिरोन र जयन सनुजाको जोडीले माल्दिभ्सका अब्दुल्ला जायन र अहमद मोहम्मदको जोडीलाई २१–१० र २१–१६ को सेटमा हरायो । श्रीलंकाकै प्रदीप असंका र अशेन कुमाराको जोडीले माल्दिभ्सका एडम नसीम र मोहम्मद अलिको जोडीलाई २१–१४ र २१–१३ को सेटमा हरायो ।

पुरुषतर्फ समूह ‘ए’ र समूह ‘बी’ मा श्रीलंकाका दुई टिम ६/६ अंकसहित शीर्षस्थानमा छन् । नेपालको दुवै टिम अंक तालिकाको तेस्रो स्थानमा छन् । शनिबार लिग चरणका खेल हुनेछ ।