साग बक्सिङ – पहिलो दिन नै कम्तीमा २ रजत पदक पक्का

काठमाडौं (हाम्रो खेलकुद)– १३औं दक्षिण एसियाली खेलकुद (साग) अन्तर्गत शुक्रबार सुरु भएको बक्सिङमा नेपालको दुई रजत पदक पक्का भएको छ । ९१ केजीभन्दा माथिको तौल समूहमा आशिष दुवाडी र महिला ६४ केजी तौल समूहमा पूनम रावलले बाई पाएर सोझै फाइनलमा स्थान पक्का गरेका छन् ।

नेपाली बक्सर सुशील थापामगर, भूपेन्द्र थापामगर र सनिल शाहीले आ आफ्नो तौल समूहमा सेमिफाइनल यात्रा तय गरेका छन् । ललितपुरको सातदोबाटोमा भएको ४९ केजी फ्लाई वेटतर्फ श्रीलंकाका मुटुनाकापा पीजीलाई अंकको आधारमा हराउँदै सुशीलले अन्तिम चारको यात्रा तय गरे ।

सनिलले ६० केजी तौल समूहको सेमिफाइनलमा प्रवेश गर्नका लागि भुटानका निमा दोर्जीलाई अंकका आधारमा हराए । ६४ केजीको भिडन्तमा भुपेन्द्रले भुटानका दोर्जी वाङ्दीलाई पहिलो राउन्डमा नै आरएससीको आधारमा पराजित गरे । ७५ केजी तौल समूहको खेलमा नेपालका दिपक श्रेष्ठ भने भारतका अंकित खतानासंग तेस्रो राउन्डमा नकआउटको आधारमा पराजित भए ।