काठमाडौं (हाम्रो खेलकुद) – १३ औं दक्षिण एसियाली खेलकुद प्रतियोगिता (साग) को छैटौं दिन आज शुक्रबार विभिन्न १९ खेलमा प्रतिस्पर्धा हुँदैछ । आजबाट काठमाडौंमा बक्सिङ, फेन्सिङ र स्क्वास तथा जनकपुरमा कुस्ती खेलको शुरुवात हुनेछ ।

शुक्रबार आर्चरी, एथ्लेटिक्स, बास्केटबल, ब्याडमिन्टन, बक्सिङ, क्रिकेट, साइक्लिङ, फेन्सिङ, गल्फ, ह्यान्डबल, कबड्डी, स्वीमिङ, सुटिङ, स्क्वास, टेबल टेनिस, टेनिस, बिच भलिबल, भारोत्तोलन र कुस्तीमा प्रतिस्पर्धा हुनेछ । ब्याडमिन्टन, महिला क्रिकेट, भारोत्तोलन, बिच भलिबल, आर्चरी र ह्यान्डबल पोखरामा हुन्छ ।

पदक तालिकामा पाँचौ दिनसम्म भारतले ६४ स्वर्णसहित अग्रता बनाएको छ । ३६ स्वर्णसहित नेपालले भारतलाई पछ्याईरहेको छ ।

आर्चरी

बिहीबारबाटै औपचारिक शुरुवात भएपनि आजबाट प्रतिस्पर्धात्मक खेल शुरु हुनेछ । पोखरामा हुने आर्चरीतर्फ नेपाल सहित भुटान, श्रीलंका र बंगलादेशको सहभागी हुनेछ । अन्तिम समयमा आएर पाकिस्तान भने सहभागी नहुने भएको छ । शुक्रबार र्याङकिङ राउण्ड हुने छ । १० स्वर्ण पदकको लागि ५७ जना खेलाडीहरुले प्रतिस्प्रर्धा गर्ने छन् । आर्चरीमा भुटानका ९ जना खेलाडीहरु प्रतियोगितामा सहभागि हुदैछन भने अन्य तीन देशका १६/१६ जना खेलाडीहरु सहभागि हुने भएका हुन् ।

एथ्लेटिक्स

एथ्लेटिक्सतर्फ शुक्रबार विभिन्न स्पर्धामा प्रतिस्पर्धा हुनेछ । दशरथ रंगशालामा बिहान ९ बजेबाट सुरु हुने एथ्लेटिक्समा १६ स्पर्धामा प्रतिस्पर्धा हुनेछ । जसमा ९ खेलको फाइनल चरणको खेल हुनेछ ।

बास्केटबल

बास्केटबलमा शुक्रबार तीन खेल हुनेछ । आज पुरुषमा बंगलादेश र माल्दिभ्स तथा भारत र भुटानले खेल्नेछ । महिलामा भारत र माल्दिभ्स खेल्ने छन् ।

ब्याडमिन्टन

ब्याडमिन्टनतर्फ शुक्रबार पनि विभिन्न इभेन्टसको खेलहरु हुँदैछ । शुक्रबार ब्याडमिन्टनको सिंगल डबल्स र मिक्स डबल्सतर्फ फाइनल स्पर्धा हुनेछ । बिहिबार भएको सेमिफाइनलमा पराजित भएपछि नेपालको ब्याडमिन्टनमा स्वर्ण जित्ने सपना समाप्त भएको थियो ।

बक्सिङ

साग अन्तर्गत शुक्रबारबाट बक्सिङका प्रतिस्पर्धा सुरु हुनेछ । पहिलो दिन बक्सिङमा नेपालले ४ इभेन्टमा प्रतिस्पर्धा गर्नेछ । सातदोबाटोस्थित कराते हलमा नेपालले ४ वटा इभेन्टमा प्रतिस्पर्धा गर्न लागेको हो ।  नेपालका सुशील थापा मगरले ४९ केजीमा भुटानी खेलाडीसँग प्रतिस्पर्धा गर्नेछन् । यस्तै, ६० केजीमा सनिल शाहि र ६४ केजीमा भुपेन्द्र थापा मगरले भुटानी खेलाडीसँग खेल्नेछन् । ७५ केजीतर्फ दिपक श्रेष्ठले भारतका खेलाडीसँग प्रतिस्पर्धा गर्नेछन् ।

क्रिकेट

त्रिवि क्रिकेट मैदान कीर्तिपुरमा पुरुषतर्फ दुई खेल हुनेछन् । पहिलो खेलमा भुटान र बंगलादेश दोस्रो खेलमा नेपाल र माल्दिभ्सबीच हुनेछ ।
पोखरा क्रिकेट रंगशालामा महिलातर्फ नेपाल र श्रीलंकाबीच खेल हुनेछ । फाइनल पुग्न नेपाललाई निश्चित जितको खाँचो छ । तर, बलियो प्रतिद्वन्दी श्रीलंकाविरुद्धको खेल नेपालको खेल सहज हुनेछैन ।

साइक्लिङ

साइक्लिङ अन्तर्गत शुक्रबार पनि विभिन्न खेल हुनेछ । साइक्लिङको प्रतिस्पर्धा गोकर्णेश्वर शान्ति पार्कमा हुनेछ ।

फेन्सिङ

फेन्सिङको खेलहरु शुक्रबारबाट नयाँ बजार कीर्तिपुरमा शुरु हुनेछ । पहिलो दिन तीन इभेन्टसमा प्रतिस्पर्धा हुनेछ । महिला फोइल इन्डिभिजुअल, पुरुष साब्री इन्डिभिजुअल र मेन्स इपी इन्डिभिजुअलमा स्वर्णका लागि प्रतिस्पर्धा हुनेछ ।

गल्फ

गोकर्ण गल्फ क्लबमा गल्फको अन्तिम प्रतिस्पर्धा हदैछ । नेपालका सुवास तामाङ र महिलामा श्रीलंकाकी ग्रेस यातावाराले अग्रता बनाएका छन् । दुवै खेलाडी स्वर्ण नजिक पुगेका छन् ।

ह्यान्डबल

ह्याण्डबलमा शुक्रबार पुरुषमा भारतले माल्दिभ्स तथा पाकिस्तानले श्रीलंकाको सामना गर्ने छ । यस्तै महिलातर्फ पाकिस्तान र भारत तथा बंगलादेशले श्रीलंकासंग खेल्ने छ ।

कबड्डी

हल्चोकस्थित सशस्त्र प्रहरी बलको मुख्यालयमा कब्बडीतर्फ शुक्रबार लिग चरणमा अन्तिम खेल हुनेछ । महिलातर्फ नेपाल र भारत एक खेल अगावै फाइनलमा पुगिसकेका छन् । नेपालले अन्तिम खेलमा भारतसँग खेल्नेछ । कबड्डी पुरुषतर्फ ५ तथा महिलामा ४ टिम सहभागी छन् ।

स्वीमिङ

पौडीको दोस्रो दिन विभिन्न ६ इभेन्टसमा प्रतिस्पर्धा गर्नेछ । सातदोबाटोस्थित स्विमिङ पुलमा १५०० मिटर फ्रिस्टाइल रिले, महिला ४०० मिटर इन्डिभिजुल मिडले, पुरुष र महिला २०० मिटर ब्याकस्ट्रोक, महिला र पुरुष १०० मिटर ब्रेस्ट स्ट्रोक र पुरुष ५० मिटर फ्रि स्टाइलमा प्रतिस्पर्धा हुनेछ । पहिलो दिन नेपालले १ स्वर्ण, एक रजत र एक कास्य जितेको छ ।

सुटिङ

सुटिङतर्फ शुक्रबार दुई खेल हुँदैछन् । बिहान पहिलो चरणमा ¥यापिड फायर पेस्तोलका खेल हुनेछ । यस्तै एयर पेस्तोल महिलाको खेल पनि हुनेछ । महिला खेल शुक्रबार फाइनल हुनेछ ।

स्क्वास
शुक्रबारबाट स्क्वासको खेलहरु हुँदैछन् । सातदोबाटोस्थित स्क्वास हलमा महिला तथा पुरुष दुवै तर्फको खेल हुनेछ । पहिलो दिन लिग चरण र क्वाटरफाइनलका खेल हुनेछन् ।

टेबल टेनिस

लैनचौरस्थित राष्ट्रिय टेबलटेनिस प्रशिक्षण केन्द्रमा बिहिबार एकलतर्फको खेल हुनेछ । शुक्रबार बिहान ९ बजेदेखि पुरुष एकलको सेमिफाइनलका खेल सुरु हुनेछ । सेमिफाइनलमा नेपालका पुरुषोत्तम बज्राचार्यले भारतका हर्मित देशाईसँग खेल्नेछन् । स्यान्टु श्रेष्ठले अमलराज एन्थोनिसँग प्रतिस्पर्धा गर्नेछन् ।

टेनिस

टेनिसमा शुक्रबार विभिन्न स्पर्धामा प्रतिस्पर्धा हुनेछ । शुक्रबार पुरुष तथा महिला एकलतर्फको खेलहरु हुनेछ । पुरुष एकलमा नेपालका संरक्षक बज्राचार्य र प्रणव खनाल क्वार्टरफाइनलमा पुगेका छन् ।

बिच भलिबल

फेवाताल किनारमा जारी बिच भलिबलतर्फ खराव शुरुवात गरेको नेपालले शुक्रबार महिला र पुरुष दुवैतर्फको लिग चरणमा खेलहरु खेल्नेछ । बिहीबार नेपालको चारै टोली पराजित भएको थियो ।

भारोत्तोलन

भारोत्तोलनमा शुक्रबार ५ स्पर्धा हुनेछ । पुरुषतर्फ ३ तथा महिलाको २ खेल हुनेछ । पुरुषमा ६७ केजी, ७३ केजी र ८१ केजीको प्रतिस्पर्धा हुनेछ भने महिलामा ५९ र ६४ केजीको स्पर्धा हुनेछ । बिहीबार सन्जु चौधरीले स्वर्ण जित्दै कीर्तिमान बनाइसकेकी छन् ।

कुस्ती

कुस्तीको खेल शुक्रबारबाट जनकपुरमा शुक्रबार सुरु हुनेछ ।