दिपक न्यौपाने, काठमाण्डौ
केहि समय यता नेपाली महिला भलिबल टोलीले एक पछि अर्को सफलताले आशाको संचार गराइरहेको छ । केहि साता अघि मात्र बंगलादेशमा एभिसी सेन्ट्रल जोन भलिबल च्याम्प्यिनसिप जितेर नेपाली टोली फर्केको थियो । त्यसअघि थाइल्यान्ड पुगेर नेपाली टोलीले सेन्ट्रल जोन र १३ औं दक्षिण एसियाली खेलकुद (साग) का लागि तयारी गरेको थियो । जहाँ नेपाली टोली ७ वटा मैत्रीपूर्ण खेल खेलेको थियो ।

सेन्ट्रल जोनका लागि थाइल्यान्ड यात्रा फलदायी साबित भयो । नेपाल च्याम्पियन बनेर फर्कियो, स्वदेशमा आयोजना हुने १३ औं साग अघिको त्यो जितले टोलीमाथिको भरोसा बढ्यो । यसअघि सागको कहिल्यै फाइनल नपुगेको नेपालको लक्ष्य कम्तीमा फाइनल पुग्ने थियो ।
घरेलु टोलीमा सुरुवात पनि दमदार ढंगमा गर्यो नेपाली टोलीले । बंगलादेशलाई सोझो सेटमा हराएको नेपालले समूह चरणको पहिलो सेटमै कडा टक्कर दिदै स्तरमा सुधार भएको संकेत दियो । भलै त्यसपछिका दुवै सेटमा नेपालले कडा टक्कर दिन सकेन ।

समूहको उपविजेतका रुपमा अघि बढेको नेपालका लागि श्रीलंकासँग सेमिफाइनलमा पनि कम चुनौतिपूर्ण थिएन । कारण थियो, त्यसअघि नेपाली टोलीले श्रीलंकालाई हराउन सकेको थिएन । नेपाली टोलीले सबैको अनुमान भन्दा निकै फरक, सानदार प्रदर्शन गर्दै श्रीलंकालाई पहिलो पटक पराजित गर्यो । त्यो जितले पहिलो पटक फाइनलको ढोका खोलेको थियो । त्यो इतिहासिक जित थियो । कारण नेपालले कम्तीका रजत पदक श्रीलंकालाई हराउँदै प्राप्त गरेको थियो ।

त्यसपछिको अन्तिम लडाई फेरि पनि भारतसँग थियो । श्रीलंकालाई हराउँदै अघि बढेको नेपाली टोलीबाट त्यसपछि भने थप सफलताको आशा गर्न थालियो । जसरी नेपाली टोलीले प्रदर्शन गरिरहेको त्यो हिसाबले त्यो आशा अस्वभाविक थिएन । त्यहि जोशमा नेपाली टोली भारतविरुद्ध उत्रियो । राखेप कभर्ड हलमा दर्शक भरिएर खुट्टा टेक्ने ठाँउ थिएन । पहिलो पटक फाइनल खेलिरहेको टोलीको उत्साह बढाउन दर्शक लालयित थिए ।

नेपाल , नेपाल भन्दै सयौ दर्शकको हुटिङले कभर्ड हल गुन्जायमान थियो । पहिलो सेट नेपालले १७–२५ ले गुामएपछि समूह चरणमा जस्तै ३–० को सोझो सेटमा टोली हार्छ भन्ने पनि भयो । तर, नेपाली टोलीलाई यसपटक सोझो सेटको हार स्वीकार्य थिएन । कडा प्रतिस्पर्धाकाबीच नेपालले दोस्रो सेट २५–२३ ले जित्यो । त्यसपछिको सेटमा नेपाल झनै शसक्त रुपमा प्रस्तुत भयो र २५–२१ ले आफ्नो पक्षमा पार्यो । २–१ ले अगाडि बढेपछि लाग्यो अब नेपाली टोली एतिहासिक जितको नजिक छ । तर, भारतले चौथो सेटमा पुनरागमन गर्यो । नेपाल २०–२५ ले पराजित भयो ।

अन्तिम तथा निर्णायक सेटमा भने नेपाली टोलीले अपेक्षा अनुसारको प्रदर्शन गर्न सकेन । भारत हाभी हुँदै गयो भने नेपाली टोलीले एक पछि अर्को गल्ति गर्यो । जसका कारण नेपाल ६–१५ ले पराजित भएको थियो । खेल सकिएपछि खेलाडीले आसु थाम्न सकेनन् । सायद, उनीहरुलाई लाग्यो होला भारतलाई भलिबलमा हराउँने यो भन्दा राम्रो मौका फेरि नआउन सक्थ्यो । अर्को एउटा इतिहास रच्नेबाट चुकेका कारण मन थाम्न गार्यो परेको प्रष्ट हुन्थ्यो ।

तर, महिला टोलीले निराश हुनुपर्ने केहि छैन । हामीले अहिले सम्मकै ठूलो सफलता हासिल गरेका छौं, कास्य पदक जितेका छौं । आउने दिनमा स्वर्ण जित्ने लक्ष्यका साथ अघि बढ्न अझै प्रेरणा मिलेको छ । सानो मन गर्नुपर्ने केहि छैन । खेलाडीलाई ढाडस दिन मुख्य अतिथि उप राष्ट्रपति नन्दबहादुर पुन उनीहरु भए ठाँउमा पुगे । उनले टोलीको प्रदर्शनको उच्च प्रशंसा गरे । खेलाडी मात्र होइन कतिपय दर्शकका आँखा भिजेका थिए । टोलीका प्रशिक्षक जगदिश भटटले चौथो सेटको कमजोरीका कारण ऐतिहासिक अवसर गुमाएको बताइरहँदा चेलीहरुको आसु धामिएको थिएन ।