काठमाडौं (हाम्रो खेलकुद)– नेपालले १३ औं दक्षिण एसियाली खेलकुद (साग) सोमबार नै १५ स्वर्ण पदक जितेको छ । सागको औपचारिक उद्घाटन भएको भोली पल्ट सोमबार तेक्वान्दो र करातेले प्रतिस्पर्धा गरेका सबै इभेन्टमा पदक जितेको छ । तेक्वान्दो र करातेमा समान ७ र ट्रायथोलनमा १ स्वर्ण पदक जितेको छ । त्यस्तै नेपालले ३ रजत र ६ कास्य पदक जितेको छ ।

तेक्वान्दोमा नेपालले १३ इभेन्टमा प्रतिस्पर्धा गर्दा ७ स्वर्ण पदक जितेको नेपालले १ रजत र ५ कास्य पदक जितेको छ । त्यस्तै करातेमा प्रतिस्पर्धा गरेको ९ मध्ये नेपाली खेलाडीले ७ वटामा स्वर्ण पदक जिते । २ खेलाडीले रजत जितेका छन् । त्यस्तै नेपालले पोखरामा भएको ट्रायथोलनमा १ स्वर्ण र १ कास्य पदक जितेको छ ।

करातेका मण्डेकाजी श्रेष्ठ र तेक्वान्दोकी आयशा शाक्यले दोहोरो स्वर्ण पदक जितेका छन् । पहिलो पटक साग खेलिरहेका मण्डेकाजीले एकल काता र टिम काता दुवैमा स्वर्ण पदक जितेका हुन् । मण्डेसँगै टिम इभेन्टमा महसुस तामाङ र प्रविण मानन्धर स्वर्ण जित्ने टोलीमा थिए ।

सागमा यसअघि नै १ स्वर्ण र २ रजत पदक जितेकी आयशाले पहिलो पटक सागमा समावेश गरिएको पुम्सेमा स्वर्ण पदक जितेकी हुन् । उनले २९ वर्षमाथिको पुम्सेमा पहिलो स्थान प्राप्त गरेका हुन् । उनले सञ्जिवकुमार ओझासँग मिलेर पेयर पुम्सेमा पनि स्वर्ण पदक जितेकी हुन् । आयशाले सन् २००६ एसियाली खेलकुदमा कास्य पदक जितेकी थिइन् । आयशाका श्रीमान् ओलम्प्यिन दीपक विष्ट सागका ४ पटकका स्वर्ण पदक विजेता हुन् ।

त्यस्तै करातेको महिला टिम कातामा नेपालका लागि निर्मला तामाङ, संगिता मगर, सरु कार्कीको टोलीले स्वर्ण पदक जितेको थियो । कुमेतेमा लक्ष्मण तामाङ, विप्लवला श्रेष्ठ, कुसुम खड्का र अनु अधिकारीले स्वर्ण जितिन् । लक्ष्मणले ५५ केजी, विप्लवले ८४ केजी माथि, कुसुमले ४५ केजी मूनि र अनुले ५० केजी मूनिमा पहिलो स्थान प्राप्त गरेका हुन् ।

तेक्वान्दोको पहिलो दिन पुम्सेका सबै इभेन्ट सम्पन्न हुँदा आधा भन्दा बढी स्वर्ण पदक नेपाली खेलाडीले जितेका छन् । आयशासँगै पुम्सेमा कमल श्रेष्ठ, सिना मादेन लिम्बु, पार्वती गुरुङले स्वर्ण जितेका छन् । नेपालले महिला टिम पुम्से १७–२३ वर्ष र २३–२९ वर्षमा स्वर्ण पदक जितेको छ ।
कमलले २३–२९ वर्ष, सिना १७ –२३ वर्षले, पार्वतीले २३ –२९ वर्षमा स्वर्ण जितेका हुन् । १७–२३ वर्षको महिला टिम पुम्से स्वर्ण जित्ने टोलीमा निशा दर्नाल, स्वस्तिका तामाङ र सन्जिला तिमल्सिना छन् । त्यस्तै निता गुरुङ, प्रशंसा क्षेत्री र शुसिला राईले पुम्से महिला टिम (२३–२९ वर्षमा पहिलो स्थान प्राप्त गरे । पोखरामा ट्रायथोलनमा सोनी गुरुङले स्वर्ण पदक जितेकी थिइन् ।

आफ्नै गल्तिमा करातेका दिवस श्रेष्ठले रजत पदकमा चित्त बुझाउनु परेको छ । उनले अन्तिम चेतावनीका रुपमा हान्साकु पाएपछि दोस्रो स्थानमा चित्त बुझाउनु परेको थियो । चन्चला दनुवारले पनि महिला एकल कातामा रजत पदक प्राप्त गरिन् । तेक्वान्दोमा कृष्णबहादुर तामाङले १७ देखि २३ वर्षको समूहमा रजत पदक जिते ।

१३ औं सागका स्वर्ण पदक विजेता

स्वर्ण पदक

कराते (एकल काता) – मण्डेकाजी श्रेष्ठ

कराते (टिम काता, पुरुष ) – मण्डेकाजी श्रेष्ठ, महसुस तामाङ, प्रविण मानन्धर

कराते (टिम काता ,महिला)– निर्मला तामाङ, संगिता मगर, सरु कार्की

कराते (५५ केजी) – लक्ष्मण तामाङ

कराते(८४ केजीमाथि)–विप्लवलाल श्रेष्ठ

कराते (४५ केजी मुनी)– कुसुम खड्का

कराते (५० केजी मूनि) अनु अधिकारी

तेक्वान्दो पुम्से (२३–२९ वर्ष ) – कमल श्रेष्ठ

तेक्वान्दो पुम्से ( १७ –२३ वर्ष )– सिना मादेन लिम्बु

तेक्वान्दो पुम्से (२३ –२९ वर्ष ) – पार्वती गुरुङ

तेक्वान्दो पुम्से (२९ वर्ष माथि ) – आयशा शाक्य

तेक्वान्दो पुम्से (२९ वर्ष माथि )- आयशा शाक्य र सञ्जिकुमार पाण्डे

पुम्से महिला टिम (१७–२३ वर्ष) – निशा दर्नाल, स्वस्तिका तामाङ र सन्जिला तिमल्सिना

पुम्से महिला टिम (२३–२९ वर्ष) – निता गुरुङ, प्रशंसा क्षेत्री र शुसिला राई

ट्रायथलन – सोनी गुरुङ

रजत पदक

कराते (एकल काता) – चन्चला दनुवार

तेक्वान्दो पुम्से (१७–२३ वर्ष)– कृष्णबहादुर तामाङ

कराते (८४ केजी मूनि)– दिवस श्रेष्ठ

कास्य पदक

तेक्वान्दो पुम्से (२९ वर्ष माथि) –रेजिन रिमाल

तेक्वान्दो पुम्से (१७–२३ वर्ष) – अस्मिन राउत र सिना मादेन लिम्बु

तेक्वान्दो पुम्से (२३–२९ वर्ष ) – जितबहादुर बोट र पार्वती गुरुङ

पुरुष टिम पुम्से १७ –२३ वर्ष – शीशिर श्रेष्ठ, अष्मिन राउत, दीपेन्द्र गुरुङ

पुरुष टिम पुम्से (२३ वर्षमाथि ) – कमल श्रेष्ठ, जितबहादुर बोट र प्रेमबहादुर लिम्बु

ट्रायथलन – बसन्त थारु