पोखरा (हाम्रो खेलकुद) – १३ औं दक्षिण एसियाली खेलकुद (साग) ट्राईयाथलनमा सोनी गुरुङले स्वर्ण पदक जितेकी छिन् । उनले निर्धारित ७५० मिटर पौडी, २० किलोमिटर साईक्लिङ र ५ किलोमिटर दौड १ घन्टा १३ मिनट ४५ सेकेन्डमा पुरा गर्दै सोनीले स्वर्ण हात पारेकी हुन् । पौडी र साइक्लिङमा पछि परेकी उनले दौडमा आफुलाई अब्बल राख्दै स्वर्ण हात पार्न सफल भएकी हुन् ।

विजयी सोनीलाई नेपाल ट्राईयाथलन संघका अध्यक्ष एवं नेपाल ओलम्पिक कमिटिका महासचिव निलेन्द्र राज श्रेष्ठले १ लाख रुपैयाँ प्रदान गर्ने घोषणा गरेका छन् । यस्तै गण्डकी प्रदेशका माननिय सासद दीपक कोईरालाले उनलाई २५ हजार रुपैयाँ दिने घोषणा गरे ।

भारतका खेलाडीले रजत र कास्य पदक जिते । सरोजनी देवीले १ घन्टा, १४ मिनटका र प्रग्न्या मोनान १ घन्टा १४ मिनट ५७ सेकेन्डमा ट्रायथोलन पुरा गरेकी थिइन् ।

पोखराको फेवातालमा भएको प्रतिस्पर्धामा पुरुष तर्फ भने नेपाली खेलाडी बसन्त थारु कास्यमा चित्त बुझाउन बाध्य भए । उनले निर्धारित दूरी १ घन्टा ३ मिनट र ०६ सेकेन्डमा पुरा गरे । पुरुष तर्फ पहिलो र दोश्रो स्थान भारतले हात पा¥यो । भारतका आदर्श एमएन सिनिमोलले निर्धारित दूरी १ घन्टा २ मिनट ३१ सेकेन्ड र बिश्वरजित साईखोम १ घन्टा २ मिनट ५९ सेकेन्डमा साथ स्वर्ण र रजत प्राप्त गरे । मंगलबार दुवाथलनका खेल बिहान ८ बजे बाट सुरु हुने छ ।

काठमाडौंमा जारी करातेमा नेपालले २ स्वर्ण र एक कास्य पदक जितिसकेको छ । त्यस्तै तेक्वान्दोमा १ स्वर्ण र १ रजत पदक जितेको छ ।
करातेमा मण्डेकाजी श्रेष्ठ र महिला टिम काताले स्वर्ण जितेका हुन् । त्यस्तै चन्चला दनुवारले रजत पदक जितेकी हुन् । तेक्वान्दो पुम्सेमा कमलबहादुर श्रेष्ठले स्वर्ण पदक जितेको हुन् । त्यस्तै १९ देखि २४ वर्ष उमेर समूहमा कृष्णबहादुर तामाङले रजत पदक जितेका छन् ।