काठमाडौं (हाम्रो खेलकुद) – नेपाली महिला भलिबल राष्ट्रिय टोलीकी कप्तान अरुणा शाहीले सोमबार भारतविरुद्ध हुने फाइनल खेलमा स्वर्ण पदकको लागि नै प्रतिस्पर्धा गर्ने बताएकी छिन् ।

नेपालले शनिबार सेमिफाइनलमा साविक उपविजेता श्रीलंकालाई सोझो सेटमा पराजित गर्दै फाइनलमा स्थान बनाएको हो । नेपाल दक्षिण एसियाली स्तरको सागको फाइनलमा प्रवेश गरेको यो नै पहिलो अवसर हो । यसअघि नेपाल सागमा तीन पटक कांस्य पदकमा सिमित हुँदै आएको थियो । ऐतिहासिक जित हासिल गर्ने क्रममा नेपालले उत्कृष्ट प्रदर्शन गरेको थियो ।

खेलपछि बोल्दै कप्तान अरुणाले श्रीलंकाले उत्कृष्ट प्रदर्शन गरेपनि आफूले राम्रो प्रदर्शन गर्न सकेको बताइन् । ‘ हामीले निकै राम्रो प्रदर्शन गर्यौं । तुलना गर्ने हो भने श्रीलंकाले पछिल्लो खेलभन्दा राम्रो खेलेको हो । तर हामी श्रीलंकालाई फेस गर्न तयार थियौं । हाम्रो टोलीले निकै राम्रो प्रदर्शन गरेको हो,’ उनले भनिन् ।

कप्तान अरुणाले नेपालले अब फाइनलमा भारतविरुद्ध स्वर्ण जित्नकै लागि खेल्ने बताइन् । ‘ हामीले फाइनल पुगेर इतिहास त रचेका छौं । तर हाम्रो लक्ष्य स्वर्ण जित्ने हो । त्यसका लागि हामीले लामो तयारी गरेका छौं । टोलीका सबै खेलाडीको मनोबल पनि उच्च छ,’ उनले थपिन् ।

समूह चरणमा हार बेहोरेपनि त्यसलाई बिर्सेर टोलीले अझ राम्रो प्रदर्शन गर्न तयार रहेको अरुणा बताउँछिन् । ‘ हामीले भारतसँग समूह चरणमा केहि दवाव लिएर खेल्यौं । अब फाइनलमा हामीलाई कुनै किसिमको दवाव हुने छैन । हामीले विना कुनै चिन्ता खुलेर खेल्नेछौं र भारतलाई पराजित गर्नका लागि नै खेल्नेछौं,’ उनले भनिन् ।

अरुणाकै कप्तानीमा नेपाल केहि साताअघि एभीसी सेन्ट्रल जोन भलिबल प्रतियोगिताको उपाधि जितेको थियो । नेपाललाई अन्तर्राष्ट्रिय भलिबलमा पहिलो उपाधि दिलाएको टोलीले सागको फाइनलमा पुगेर अर्को इतिहास रचेको छ । नेपालले अब भारतविरुद्ध सोमबार फाइनल खेल्नेछ । कम्तिमा रजत पदक पक्का भएको नेपालले इतिहास रचिसकेको छ ।

यो पनि : ऐतिहासिक जितसँगै नेपाल फाइनलमा

यो पनि : कप्तानीमा अरुणाको स्वर्ण सुरुवात