काठमाडौं (हाम्रो खेलकुद) – आसन्न १३औं दक्षिण एसियाली खेलकुद (साग) को उद्घाटन र समापन हुने त्रिपुरेश्वस्थित दशरथ रंगशालाको भिआइपी प्याराफिटतर्फ छानो हाल्ने कार्य शुरु भएको छ ।

बुधबारबाट भिआइपी प्याराफिटतर्फ चीनबाट ल्याइएको फेवरिक छानो हाल्न शुरु गरिएको हो । साग नजिकिदै गर्दा भिआइपीतर्फको छानो हाल्ने कार्य नसकिने हो कि भन्ने चिन्ता बढेपनि एक साताभित्र छानो हाल्ने कार्य सकिने राखेपले जनाएको छ । चीनमै रोकिएको छानो एयर कार्गोमार्फत निर्माणस्थलबाट गोन्जाओ हुँदै चाईना साउथन एयरलाईन्समार्फत नेपाल एक साताअघि नेपाल आइपुगेको थियो । गत शुक्रबारबाटै छानो हाल्ने कार्य थालनी गरिने बताएपनि डिजाइन र साइजमा फरक हुँदा  ढिला गरी बुधबारबाट कार्य शुरु भएको हो ।

रंगशालाको ताजा अवस्थाको भिडियो हेर्नुहोस :

प्याराफिटमा लाग्ने भन्दा ठुलो साइजको छानो रहेका कारण फिटिङमा समस्या भइरहेको छ । तर, राखेपले एक साताभित्र छानो हाल्ने कार्य सकिने जनाएको छ । राखेपका अनुसार १० गते सम्म फिटिङ लागि समय लाग्ने भएको छ । छानोका लागि १९ वटा पोल र ट्रस खडा भइसकेका छन् ।

कपडा जस्तै धुन मिल्ने विशेषता रहेको टेन्साइल फेवरिक छानोको मुल्य ४ करोड ५५ लाख रुपैयाँ रहेको छ । साधारण प्यारापिटतर्फको भने यसअघि नै छानो हाल्ने कार्य सम्पन्न भइसकेको छ । अहिले साधारण प्याराफिटतर्फ सिट (कुर्ची) हाल्ने कार्य अन्तिम चरणमा छ । भीआईपीतर्फ भने छानो हाल्ने कार्य सकिएपछि कुर्सि हालिनेछ ।