ढाका (हाम्रो खेलकुद) – उपाधिको दावेदार नेपालले एभीसी एसियन सेन्ट्रल जोन सिनियर महिला भलिबल च्याम्पियनसिपको आफ्नो दोस्रो खेलमा किर्गिस्तानमाथि सहज जित निकालेको छ ।

ढाका मिरपुरस्थित शहिद शुरवार्दी इन्डोर हलमा सोमबार भएको खेलमा नेपालले किर्गिस्तानमाथि ३–० को सहज जित निकालेको हो । च्याम्पियनसिपमा नेपालको यो दोस्रो जित हो । यसअघि नेपालले अफगानिस्तानमाथि ३–० कै सोझो जित निकालेको थियो । पहिलो टेक्निकल टाइमअघि नेपालले ८–७ को अग्रता लिएको थियो । त्यसपछि नेपालले लगातार १० अंक जोड्दै १८–८ को आरामदायी स्थितिमा ल्याउदै  पहिलो  सेट २५–१५ ले आफ्नो पक्षमा पारेको थियो ।

प्रतिस्पर्धात्मक बनेको दोस्रो सेटमा नेपालले २५–१९ को जित निकाल्यो । राम्रो शुरुवात गरेपनि नेपाले मध्यतिर अंक गुमाउदा किर्गिस्तानले १ अंकको अग्रता लिएको थियो । तर, त्यसपछि नेपालले खेलमा पूनरागमन गर्दै जित निकाल्यो । तेस्रो सेटमा पनि किर्गिस्तानले नेपाललाई टक्कर दिने प्रयास गरेपनि नेपाल २५– २० को सेटमा विजयी रहन सफल भयो । जितसँगै अपराजित रहेको नेपालले दुई खेलबाट ६ अंक जोडेको छ । पराजित किर्गिस्तानको १ अंक छ ।

आजै केहीबेरमा माल्दिभ्स र अफगानिस्तानबीच खेल हुनेछ । दुई खेलमा जित हात पारेको माल्दिभ्सले ५ अंक जोडेको छ । बंगलादेशको ३ अंक छ । अंकविहीन आफगानिस्तान पुछारमा छ । राउन्ड रोविन लिगपछि शीर्ष दुई टोलीले बिहीबार उपाधिका लागि खेल्नेछ । सोही दिन तेस्रो र चौथो स्थानको प्ले अफ हुनेछ । च्याम्पियनसिपका सबै खेलहरु शहिद शुरवार्दी इन्डोर स्टेडियम मिरपुर ढाकामा हुनेछ ।