काठमाडौं (हाम्रो खेलकुद) – प्रशिक्षण र केही अभ्यास खेलका लागि थाइल्यान्डमा रहेको नेपाली राष्ट्रिय महिला भलिबल टोलीले पहिलो अभ्यास खेलमा जित हात पारेको छ ।

थाइल्यान्डको बैंककस्थित एसियाकै उत्कृष्ट प्रशिक्षण केन्द्र एफआइभीवी डेबलपमेन्ट सेन्टरमा शुक्रबार भएको पहिलो अभ्यास खेलमा जरानसानिवोङ युमाथि ३–१ को जित हात पारेको हो ।

नेपालले बैंकक युनिभर्सिटी बिहीबारै खेल्ने तालिका रहेको थियो । तर, उक्त खेल हुन सकेन ।

पहिलो सेट सहजै २५–१५ ले आफ्नो पक्षमा पारेको नेपाली टोलीले दोस्रो सेट २२–२५ ले गुमाएको थियो । त्यसपछिको दुवै सेट नेपालले २५–१९ र २५–१६ ले सहजै आफ्नो पक्षमा पारेको थियो ।

नेपाली टोली प्रथम एभीसी एसियन सेन्ट्रल जोन महिला भलिबल च्याम्पियनसिप र १३औं साग लागि प्रशिक्षणमा रहेको छ । सोही प्रतियोगिताको थप प्रशिक्षण र अभ्यास खेलका लागि नेपाली टोली गत बुधबार त्यसतर्फ प्रस्थान गरेको थियो । नेपालले अब दोस्रो अभ्यास खेल आइतबार खेल्ने टिम व्यवस्थापका रिता कोइरालाले जानकारी गराइन् ।

टोलीले दैनिक दुई समयमा (बिहान र साँझ) प्रशिक्षण गरिरहेको छ । त्यहाँको प्रशिक्षण र अभ्यास खेलपछि नेपाली टोली सेन्ट्रल जोनका लागि बंगलादेश प्रस्थान गर्नेछन् । सेन्ट्रल जोन ढाकामा २२ कात्तिकदेखि २७ सम्म आयोजना हुदैछ । त्यसपछि नेपाली टोली १३औं सागको तयारीमा जुट्नेछ । १३औं साग १५ देखि २४ मंसिरसम्म काठमाडौं र पोखरामा आयोजना हुदैछ ।