काठमाडौं (हाम्रो खेलकुद) – महिला राष्ट्रिय च्याम्पियन नविता श्रेष्ठ छनोटमा शतप्रतिशत जित निकाल्दै नेपालमा आसन्न मंसिरमा आयोजना हुने १३औं दक्षिण एसियाली खेलकुद (साग) का लागि टेवलटेनिसबाट छनोट भएकी छन् ।

लैनचौरस्थित टेबल टेनिस प्रशिक्षण केन्द्रमा दुई दिनसम्म चलेको छनोटमा महिला र पुरुषमा समान ५–५ गरी १० खेलाडी छनोट भएको हो । महिलामा नवितासहित ५ खेलाडी रविना महर्जन, दीक्षा तामाङ, एलिना महर्जन र सिक्का सुवाल छनोट भइन् ।

पुरुषतर्फ विनेश खनिया, पुरुषोत्तम बज्राचार्य, शिव सुन्दर गोथे र संयोग कपाली छनोट भए । राष्ट्रिय च्याम्पियन स्यान्टु श्रेष्ठलाई अर्काे एक मौका दिइएको नेपाल टेबल टेनिस संघले जनाएको छ । स्यान्टु गत बुधबार सवारी दुर्घटनामा परेका थिए । उनको अहिले उपचार भइरहेको छ । स्यान्टुलाई रिकभरको लागि ४० दिनको समय दिइएको र त्यसपछि छनोटमा पाँचौ स्थानमा रहेका सुनिल महर्जनसँग प्रतिस्पर्धा गर्नुपर्नेछ । जित्नेले सागको टोलीमा समावेश हुने संघले जनाएको छ ।

छनोटमा अपराजित रहेकी नविताले सोनु थापामगर, रविना महर्जन, एलिना महर्जन, स्वेच्छा नेम्वाङ, दीक्षा दाहाल, दीक्षा तामाङ, सेलिसा खड्गी, गीता भुजेल र सिक्का सुवाललाई पराजित गरिन् ।

रविनाले सोनु थापामगर, एलिना महर्जन, दीक्षा दाहाल, दीक्षा तामाङ, सेलिसा खड्गी, गीता भुजेल र सिक्का सुवाललाई पराजित गर्दा नविता श्रेष्ठ र स्वेच्छा नेम्वाङसँग पराजित भइन् । दीक्षाले सोनु, एलिना, स्वेच्छा, दीक्षा दाहाल, गीता र सिक्का सुवाललाई पराजित गर्दा नविता श्रेष्ठ, रविना महर्जन र सेलिसासँग पराजित भइन् ।

एलिना महर्जनले दीक्षा दाहाल, सेलिसा खड्गी, गीता भुजेल र सिक्का सुवाललाई पराजित गर्दा सोनु थापामगर, नविता श्रेष्ठ, रविना महर्जन र दीक्षा तामाङसँग पराजित भइन् । सिक्काले सोनु थापा मगर, एलिना महर्जन, दीक्षा दाहाल, सेलिसा खड्गी र गीता भुजेललाई पराजित गर्दा नविता, रविना, एलिना र दीक्षा तामाङसँग पराजित भइन् ।

पुरुषतर्फ विनेशले छनोटमा ८ मध्ये ७ खेलमा जित हात पारे । उनले प्रदीप रोका, मणि लामा, सुनिल महर्जन, पुरुषोत्तम बज्राचार्य, कृष्ण थापामगर, र संयोग कपाली र शिव सुन्दर गोथेलाई पराजित गरे । उनी चन्दन शाहीसँग पराजित भएका थिए ।

पुरुषोत्तम बज्राचार्य विनेशसँग मात्रै पराजित भए । शिव सुन्दर सुनिल महर्जन, पुरुषोत्तम बज्राचार्य र विनेशसँग पराजित भए । संयोग कपाली मणि लामा, शिव सुन्दर सुनिल महर्जन, पुरुषोत्तम बज्राचार्य र विनेशसँग पराजित भए । छनोटको पाँचौमा रहेका सुनिल महर्जनले मणि लामा, पुरुषोत्तम बज्राचार्य र विनेश खनिया र संयोग कपालीसँग हार बेहोरे ।