काठमाडौं (हाम्रो खेलकुद) – एभीसी पुरुष सिनियर सेन्ट्रल जोन भलिबल च्याम्पियनसिपमा आयोजक नेपालले आज पाँचौ स्थानका लागि अफगानिस्तानसँग खेल्दैछ ।

नेपाल र अफगानिस्तानबीचको खेलमा दिउँसो ३ बजेपछि लगनखेलमा रहेको नेपाली सेनाको कभर्डहलमा हुनेछ । घरेलु कोर्टमा नेपाल जारी च्याम्पियनसिपमा पहिलो जितको खोजीमा कोर्टमा उत्रनेछ । नेपाल समूह चरणमा किर्गिस्तान र माल्दिभ्ससाग ३–० को सोझो सेटमा पराजित भएको थियो । त्यसैले नेपाललाई आफ्ना समर्थकमाझ निश्चत जित आवश्यक छ ।

पाँचौ स्थानको लागि हुने खेलमा पनि सोझो सेटमा पराजित भए, सेन्ट्रल जोन भलिबल च्याम्पियनसिपमा नेपालको सबैभन्दा खराव प्रदर्शन हुनेछ । चौथो संस्करण सकिदा नेपालले कुनै एक खेलमा १ सेटमा जित हात पारेको छ । सेन्ट्रल जोन च्याम्पियनसिप अघि नेपालले अफगानिस्तानमाथि दुई मैत्रीपुर्ण खेलमा समान ३–२ को रोमाञ्चक जित निकालेको थियो । त्यही उच्च मनोवलमा नेपाली टोली हुनेछ । तर, मैत्रीपुर्णपछिको दुई खेल मध्ये माल्दिभ्ससँगको खेल बिर्सनलायक रहेको थियो । त्यही पीडादायी हारलाई बिर्सने प्रयासमा टोली रहनेछ ।

यही च्याम्पियनसिपको तेस्रो संस्करणमा नेपालले ऐतिहासिक कास्यपदक हात पारेको थियो । यता, सेन्ट्रल जोनमा उच्च प्रदर्शन गरेको अफगानिस्तान घरेलु टोलीलाई स्तब्ध पार्दै पाँचौ स्थान हात पार्ने लक्ष्यमा हुनेछ । अघिल्ला दुई मैत्रीपुर्ण खेलमा बेहोरेको हारको बदाला लिने दाउमा अफगानिस्तान रहनेछ । समूह ‘बी’ मा अफगानिस्तानले १ खेलमा जित र दुईमा हार बेहोरेको थियो ।

अफगानिस्तानले बंगलादेशमाथि ३–२ को संघर्षपुर्ण जित निकालेको थियो । तुर्केमिनिस्तान सँग ३–१ को सेटमा तथा उज्वेकिस्तानसँग ३–० को सेटमा पराजित भएको थियो । शुक्रबार नै तेस्रो स्थानको लागि माल्दिभ्स र तुर्केमिनिस्तानबीच खेल हुनेछ । बिहीबार भएको सेमिफाइनलमा माल्दिभ्स उज्वेकिस्तानसँग ३–० को सोझो सेटमा तथा तुर्केमिनिस्तान किर्गिस्तानसँग ३–० को सोझो सेटमा पराजित भएको थियो ।

च्याम्पियनसिपको फाइनल शनिबार किर्गिस्तान र उज्वेकिस्तानबीच हुनेछ । खेल दुइ बजेपछि हुनेछ । किर्गिस्तान दोस्रो उपाधि जित्ने लक्ष्यमा रहँदा उज्वेकिस्तान पहिलो उपाधिको खोजीमा रहनेछ । किर्गिस्तान तेस्रो संस्करणको च्याम्पियन हो ।