काठमाडौं (हाम्रो खेलकुद) – नेपाली भलिबलको इतिहासमा पहिलोपटक आयोजना भइरहेको एभीसी सेन्ट्रल जोन सिनियर पुरुष भलिबल च्याम्पियनसिपको दोस्रो दिन आज तीन खेल हुदैछ ।

लगनखेलमा रहेको नेपाली सेनाको कभर्डहलमा हुने च्याम्पियनसिपको पहिलो खेलमा समूह ‘बी’ को बंगलादेश र अफगानिस्तान खेल्दैछन् । खेल ३ बजेपछि शुरु हुनेछ ।

दुवै टोली पहिलो खेलमा पराजित रहेकाले आजको खेलमा जित हात पार्ने दाउमा हुनेछ । अफगानिस्तान पहिलो खेलमा तुर्केमिनिस्तानसँग ३–१ को पराजित भएको थियो ।

यही समूहको अर्काे खेलमा बंगलादेश उज्वेकिस्तानसँग ३–० को सोझो सेटमा पराजित भएको थियो । मंगलबार नै समूह ‘बी’ मा पहिलो खेलमा जित हात पारेका तुर्केमिनिस्तान र उज्वेकिस्तानबीच खेल हुनेछ । खेल ५ बजेपछि हुनेछ । दुवै टोली लगातार दोस्रो जितको खोजीमा रहने भएकाले खेल निकै रोमाञ्चक हुने अपेक्षा गरिएको छ ।

मंगलबार नै समूह ‘ए’ को किर्गिस्तान र माल्दिभ्सबीच खेल हुनेछ । खेल ७ बजेपछि शुरु हुनेछ । पहिलो खेलमा घरेलु टोली नेपाललाई ३–० को सोझो सेटमा पराजित गरेको किर्गिस्तान माल्दिभ्सलाई पराजित गर्दै समूह विजेताको रुपमा सेमिफाइनल पुग्ने दाउमा हुनेछ ।

यो खेलमा माल्दिभ्स पराजित भए, नेपालको सेमिफाइनल पुग्ने सम्भावना रहन्छ । र सेमिफाइनल प्रवेशका लागि बुधबार हुने खेलमा माल्दिभ्सलाई पराजित गर्नुपर्ने हुन्छ । नेपालका लागि माल्दिभ्सविरुद्धको खेल गर या मरकै अवस्थामा हुनेछ । पराजित भए नेपाल समूह चरणबाटै बाहिरिनेछ । माल्दिभ्सले किर्गिस्तानलाई पराजित गरेको खण्डमा नेपालको सम्भावना झिनो बन्नेछ ।

प्रतियोगिताको सम्पूर्ण खेलहरू हाम्रो खेलकुदले प्रत्यक्ष प्रसारण गर्नेछ ।