काठमाडौं (हाम्रो खेलकुद) – नेपाली भलिबल इतिहासमै पहिलो पटक नेपालमा आयोजना हुन लागेको पाँचौ संस्करणको एभीसी एसियन सेन्ट्रल जोन पुरुष भलिबल च्याम्पिनसिपका लागि सहभागी टोलीहरु आउने क्रम जारी छ । यसक्रममा रसियन ब्लकका दुई टोली तुर्कमेनिस्तान र किर्गीस्तान पनि शनिबार विहान नेपाल आइपुगेका छन् ।

दुवै टोली आज विहान १:३० बजे काठमाडौंमा आइपुगेका हुन् । टोलीहरुलाई नेपाल भलिबल संघका उपाध्यक्षद्वय निरोज मास्के, ऐन बहादुर शाही, सचिव मनवीर छन्त्याल र सदस्यद्वय ज्योति केसी र रोशन श्रेष्ठलगायतले त्रिभुवन अन्तर्राष्ट्रिय विमानस्थलमा स्वागत गरे । टोलीरु पक्नाजोलस्थित होटल मुनलाइटमा बस्नेछन् । अन्य सबै टोली आइसकेको अवस्थामा अब उज्वेकिस्तान आइतबार बिहान नेपाल आउनेछ ।

सेन्ट्रल जोनका लागि अफगानिस्तानको टोली गत मंगलबार नै नेपाल आइसकेको छ । टोलीले नेपालसँग दुई मैत्रीपुर्ण खेल खेलिसकेको छ । जसमा नेपाल दुवै खेलमा ३–२ को सेटमा विजयी हुन सफल भएको थियो । प्रतियोगितामा नेपालसहित बंगलादेश, माल्दिभ्स, अफगानिस्तान, किर्गिस्तान, तुर्किमिनिस्तान र उज्वेकिस्तानसहित ७ टोलीले प्रतिस्पर्धा गर्नेछन् ।

नेपाल रहेको समूह ‘ए’ मा माल्दिभ्स र किर्गिस्तानसहित ३ टोली रहेका छन् । यस्तै समूह ‘बी’ मा साविकको विजेता तुर्कमेनिस्तान, बंगलादेश, उज्बेकिस्तान र अफगानिस्तान रहेका छन् । नेपालले समूह चरणको एक खेल मात्र जितेपनि सेमिफाइनलमा पुग्ने सम्भावना बलियो बनेको छ । दुवै समूहबाट शीर्ष २ टोली सेमिफाइनलमा प्रवेश गर्नेछन् ।

समूहको तेस्रो स्थानमा आउने दुई टोलीले पनि पाँचौ र छैटौं स्थानका लागि प्रतिस्पर्धा गर्नेछन् । यस्तै सेमिफाइनलमा पराजित दुई टोलीले तेस्रो स्थानको लागि पनि प्रतिस्पर्धा गर्नेछन् । नेपालले समूह चरणका खेलमा सोमबार ४ बजे किर्गिस्तानको सामना गर्नेछ । दोस्रो खेलमा बुधबार ५ बजे माल्दिभ्ससँग खेल्नेछ । तालिका अनुसार सेमिफाइनल बिहीबार तथा फाइनल खेल शनिबार २ बजे हुनेछ ।

च्याम्पियनसिप लगनखेलस्थित सैनिक शारीरिक तालिम तथा खेलकुद केन्द्रमा भदौ २ देखि भदौ ७ गतेसम्म संचालन हुनेछ । च्याम्पियनसिपको सबै खेलको हाम्रो खेलकुद डटकमले प्रत्यक्ष प्रसारण गर्नेछ ।