काठमाडौं (हाम्रो खेलकुद) – नेपाली राष्ट्रिय भलिबल टोलीले अफगानिस्तानविरुद्ध लगातार दोस्रो जित दर्ता गर्दै दुई खेलको मैत्रीपूर्ण सिरिज २-० ले जितेको छ । बिहीबार लगनखेलस्थित आर्मी कभर्ड हलमा भएको खेलमा नेपाल २-० सेटले पछाडी परेपनि उत्कृष्ट पुनरागमन गर्दै खेल जित्न सफल भयो ।

अफगानिस्तानले पहिलो सेट २५-२२ ले आफ्नो पक्षमा पारेको थियो । दोस्रो सेटमा नेपालले लय गुमाएपछि अफगानिस्तान २५-१५ ले विजयी हुँदै खेलमा पकड जमाउन सफल रहयो । कुलबहादुर थापाले अपेक्षित प्रदर्शन गर्न नसक्दा नेपाल समस्यामा परेको थियो ।

नेपालले तेस्रो सेटमा पुनरागमन गर्दै २६-२४ को जित दर्ता गर्यो । चौथो सेटमा पनि २६-२४ कै प्रतिस्पर्धात्मक जित दर्ता गरेपछि खेल पाँचौ सेटमा पुगेको थियो । निर्णायक सेटमा नेपाल १५-१२ ले विजयी रहँदै लगातार दोस्रो जित दर्ता गर्न सफल रहयो । नेपालका लागि स्पाइकर राजकुमार निरौला र राजेन्द्र विष्टले उत्कृष्ट प्रदर्शन गरे ।

नेपालका लागि आजको खेलमा कप्तान ईम बहादुर राना र धनबहादुर भट्टले खेलेनन् । कप्तान ईम मांशपेशीको चोटले बाहिर रहेका हुन् भने धनबहादुरको कुर्कुच्चा सुन्निएको छ । दुवै खेलाडीलाई एभीसी सेन्ट्रल जोनको लागि विश्राम दिइएको हो । ईमको अनुपस्थितिमा मुख्य सेटरको भूमिका निर्वाह गरेका हरिहजुर थापाले राम्रो प्रदर्शन गरे । लिबेरो विनोद चन्दको प्रदर्शन औसत रहयो ।

पहिलो खेलमा ३-२ ले विजय्यी रहेको नेपालले दोस्रो खेलमा जित दर्ता गर्दै सेन्ट्रल जोन प्रतियोगिताको तयारी पनि पूरा गरेको छ । अब नेपालले सोमबारदेखि सुरु हुने प्रतियोगिताको लागि केहि दिन प्रशिक्षण गर्नेछ ।

खेलको भिडियो :