काठमाडौं (हाम्रो खेलकुद) – नेपाली राष्ट्रिय भलिबल टोलीका कप्तान इम बहादुर रानाले अफगानिस्तानविरुद्धको दोस्रो मैत्रीपुर्ण खेल नखेल्ने भएका छन् । अर्का भरपर्दा ओपन स्पाइकर धन बहादुर भट्टले पनि खेल्ने सम्भावना न्यून रहेको छ ।

बुधबार अफगानिस्तानविरुद्धको अन्तर्राष्ट्रिय मैत्रीपुर्ण खेलमा ३–२ को रोमाञ्चक जित हात पार्दा उच्च प्रदर्शन गरेका इम र धनले खेल दौरान चोट बोकेका थिए । दुवै टोलीमा नरहँदा नेपाललाई समस्या हुनेछ । नेपाली टोलीका प्रशिक्षक सुदेश कुमार रिमालले इमलाई आजको खेलमा विश्राम दिने र धनको विषयमा टिम मिटिङ पछि नै निर्णय हुने हाम्रो खेलकुदलाई जानकारी गराए । टोलीका मुख्य प्रशिक्षक हान एबिङले धनलाई पनि विश्राम दिनै नयाँ खेलाडी प्रयोग गर्ने सम्भावना छ ।

प्रशिक्षक रिमालले परीक्षणमा इमको मांशपेशीमा समस्या देखिएको र गम्भीर समस्या नरहेपनि आजको खेलमा जोखिम नमोल्ने बताएका छन् । ‘हामी इमलाई आजको खेलमा जोखिम मोल्ने छैनौ । उनलाई सेन्ट्रल जोनसम्म तयार पार्नेछौं । मैत्रीपुर्ण खेलभन्दा पनि प्रतियोगिता नै ठुलो कुरा हो ।’ प्रशिक्षक रिमालले भने, ‘धनको पनि रिपोर्टमा सामान्य सुन्निएको देखिएको छ । उनले पनि नखेल्ने सम्भावना छ । तर, टिम मिटिङ पछि नै थाहा हुनेछ ।’

बुधबार भएको पहिलो खेलमा चौथो सेटको अन्तिम समयमा खुट्टामा समस्या आएपछि इम बाहिरिएका थिए । चोट बोकेलगत्तै बाहिर निस्केर फिजियोसँग रहेका इम खेल सक्कुन्जेल सम्म त्यहीं बिताएका थिए । अफगानी खेलाडीले स्पाइक गरेपछि ल्यान्ड गर्ने क्रममा उनको खुट्टामा परेपछि धनबहादुरको कुर्कुच्चानिर चोट लागेको हो ।

नेपाल र अफगानिस्तानबीचको खेल आज दिउसो ३ बजेपछि नेपाली सेनाको कभर्डहलमा हुनेछ । खेलको हाम्रो खेलकुद डट कमले प्रत्यक्ष प्रसारण गर्नेछ ।