काठमाडौं (हाम्रो खेलकुद) – नेपालमै आयोजना हुन लागेको पाँचौ एभीसी एसियन सेन्ट्रल जोन सिनियर पुरुष भलिबल च्याम्पियनसिपको तयारी स्वरुप खेलिएको मेत्रीपुर्ण खेलमा नेपालले रोमाञ्चक जित निकालेको छ ।

लगनखेलस्थिन नेपाली सेनाको कभर्डहलमा बुधबार भएको खेलमा नेपालले अफगानिस्तानमाथि ३–२ को रोमाञ्चक जित निकालेको हो । पहिलो सेटमा तालमेल मिलाउन नसक्दा २२–२५ ले गुमाएको नेपालले त्यसपछिको दुवै सेट २५–१७ र २५–२१ ले आफ्नो पक्षमा पार्दै जित नजिक पुगेको थियो । तर, प्रतिस्पर्धात्मक चौथो सेटको मध्यतिर कप्तान इम रानालाई चोटले गुमाएपछि सेट नै २३–२५ ले गुमाउन पुगेको थियो ।

निर्णायक सेटमा उत्कृष्ट प्रदर्शन गरेको नेपालले शुरुवातमा ८–५ को अग्रता लिएपनि लगतार ३ अंक गुमाउँदाखेल बराबरीमा पुगेको थियो । १०–१० को बराबरीको अवस्थामा रहँदा नेपालले लगातार दुई अंक जोड्दै जितको आधार तयार पार्दै १५–१३ को जित निकाल्दै नेपाललाई जित दिलाए । अन्तिम अंकका लागि भन बहादुर भट्टको स्पाइकलाई अफगानी खेलाडीले ब्लक गरेपनि आउट हुन पुगेको थियो ।

नेपालका लागि आजको खेलमा तीन खेलाडीले राष्ट्रिय टोलीबाट डेब्यु गरे । राजेन्द्र विष्ट र दुर्गा खड्कासँगै टेकराज अवस्थीले पहिलो पटक राष्ट्रिय टोलीको जर्सी पहिरिए । अब नेपालले बिहीबार पनि पुनः अफगानिस्तानसँग खेल्दैछ । खेल ३ बजेपछि सेनाको कभर्डहलमा शुरु हुनेछ ।

खेलको पूरा भिडियो: