काठमाडौं (हाम्रो खेलकुद)– एभीसी सेन्ट्रल जोन भलिबल च्याम्पियनयिसपमा भाग लिने अफगानिस्तानको भलिबल टोली मंगलबार नेपाल आइपुगेको छ । नेपाली भलिबल टोलीसँग दुई मैत्रीपूर्ण खेल खेल्नका लागि अफगानी टोली एक साता अघि नै नेपाल आइपुगेको हो । नेपाल र अफगानिस्तानबीच बुधबार र बिहीबार दुईवटा अभ्यास खेल हुनेछ ।

भारतमा रहेको अफगानिस्तनको टोली मंगलबार बिहान ९ बजे त्रिभुवन विमानस्थल आइपुगेको हो । विमानस्थलमा अफगानिस्तानको १८ सदस्यीय टोलीलाई संघकी उपाध्यक्ष निरोज मास्के, सदस्य ज्योति केसी, रिता कोइराला लगायतले स्वागत गरेका थिए ।

टोलीका प्रशिक्षक मोहमद युसुफ सादेकले अफगानिस्तान उपाधि जित्ने लक्ष्य लिएर नेपाल आएको बताए । ‘हाम्रो लक्ष्य उपाधि जित्नु नै हो । हामीले राम्रो तयारी गरेका छौं । भारतमा प्रशिक्षण क्याम्पपछि नेपालसँगै मैत्रीपूर्ण खेलले सहयोग गर्नेछ,’ उनले भने । अफगानी टोलीका कप्तान अोमिद जद्रानले पनि नेपालमा नेपाली टोलीलाई हराएर उपाधि जित्न तयार रहेको बताए ।

इम रानाको कप्तानीमा नेपालले सोमबार मात्र १४ सदस्यीय भलिबल टोलीको घोषणा गरेको थियो । जसमा पहिलो पटक तीन खेलाडी सेमेटिएका छन् ।

भदौ २ गते देखि लगनखेलस्थित आर्मीको कभर्ड हलमा हुने च्याम्पियनसिपमा नेपालसँगै साविक विजेता तुर्कमेनिस्तान, उज्बेकिस्तान, अफगानिस्तान, माल्दिभ्स, किर्गिस्तान र बंगलादेशले प्रतिस्पर्धा गर्नेछन् । यहि च्याम्पियनसिपमा नेपालले तीन वर्षअघि कास्य पदक जितेको थियो । नेपालले हालसम्म अन्तर्राष्ट्रिय भलिबल प्राप्त गरेको एकमात्र पदक यसै प्रतियोगितामा हो ।

यसपटक नेपाली टोली उक्त सफलतालाई सुधार गर्नेलक्ष्यसहित प्रशिक्षणमा छ । टोलीको प्रशिक्षण डच प्रशिक्षक हान एबिङले सम्हालेका छन् । नेपाली टोलीले असार पहिलोसाताबाट नियमत प्रशिक्षण गरिरहेको छ । च्याम्पियनसिपको च्याम्पियनसिपको प्रत्यक्ष प्रसारण हाम्रो खेलकुद डट कमले गर्नेछ ।