काठमाडौं (हाम्रो खेलकुद) – नेपाल नम्बर १ स्यान्टु श्रेष्ठ र नविता श्रेष्ठले शनिबार सम्पन्न एसियन च्याम्पियनसिप छनोट प्रतियोगितामा अपराजित रहँदै प्रथम स्थान हासिल गरेका छन् ।

इन्डोनेसियाको योग्यकार्तामा सेप्टेम्बर १५ देखि २२ सम्म हुने प्रतियोगिताको लागि पुरुष र महिलातर्फ ३-३ खेलाडी छनोट गर्न प्रतियोगिता आयोजना गरिएको थियो । लैनचौरस्थित केन्द्रीय प्रशिक्षण केन्द्रमा आयोजित प्रतियोगितामा पुरुषमा स्यान्टुसँगै अमरलाल मल्ल र संयोग कपाली तथा महिलातर्फ नविता, सिक्का सुवाल र एलिना महर्जन शीर्ष ३ मा रहेर छनोट भए ।

पुरुषतर्फ अन्तिम खेलमा अमरलाल मल्ललाई ३-१ ले पराजित गर्दै स्यान्टु अपराजित रहे । पहिलो सेटमा अमर ११-७ ले विजयी रहेपनि स्यान्टुले त्यसपछि ११-७, ११-८, ११-८ को जित दर्ता गरे । संयोगले तेस्रो स्थान हात पार्न दोस्रो वरीयताका प्रदीप रोक्कालाई ३-१ ले हराएका थिए । पहिलो सेट ११-५ ले जितेका संयोगले दोस्रो सेट ११-६ ले गुमाए । त्यसपछि ११-७, ११-८ को जित दर्ता गर्दै संयोगले प्रदीपलाई हराए ।

महिलातर्फ विजेताको टुंगो लगाउन भएको अन्तिम खेलमा पाँचौ वरीयताकी  सिक्काले नवितालाई पहिलो सेटमा ११-५ ले पराजित गरेपनि त्यस लयलाई कायम राख्न सकिनन् । उनले त्यसपछि लगातार तिन सेट ११-७, ११-५, ११-४ ले पराजित हुँदै दोस्रो स्थानमा सिमित भइन् । नविता पछिल्लो ८ वर्षदेखि अपराजित रहँदै आएकी छिन् ।

तेस्रो स्थानको खेलमा दोस्रो वरीयताकी एलिनाले स्वेच्छा नेम्वाङलाई ३-२ ले पराजित गरिन् । निकै प्रतिस्पर्धात्मक खेलमा एलिना ११-९, ११-४, ८-११, ८-११, ११-४ ले विजयी रहिन् । महिलातर्फ निकै आशा गरिएकी चौथो वरीयताकी दिक्षा तामाङ र रविना महर्जनले शीर्ष ४ मा पनि स्थान बनाउन सकेनन् । पुरुषतर्फ प्रदीप र महिलातर्फ स्वेच्छा वैकल्पिक खेलाडीका रुपमा रहेका छन् ।