काठमाडौं (हाम्रो खेलकुद) – विश्व तेक्वान्दो महासंघका अध्यक्ष चुङवन चोएले नेपाल तेक्वान्दो संघ अन्तर्राष्ट्रिय मान्यता प्राप्त नेपालको एकमात्र तेक्वान्दो संघ रहेको स्पष्ट पारेका छन् ।

अध्यक्ष चोएले सोमबार सातदोबाटोस्थित नेपाल तेक्वान्दो संघ परिसरमा विश्व तेक्वान्दोको क्षेत्रीय प्रशिक्षण केन्द्र उद्घाटन गर्ने क्रममा संचारकर्मी माझ तेक्वान्दो संघको वैधानिकतालाई लिएर विश्व तेक्वान्दो महासंघको धारणा प्रस्तुत गरेका हुन् । ‘ विश्व तेक्वान्दो महासंघ ओलम्पिक मान्यता प्राप्त एकमात्र महासंघ हो । हामीले नेपालमा नेपाल तेक्वान्दो संघलाई नै आधिकारिकता दिएका छौं । हाम्रो सम्पूर्ण कार्यक्रम यसै संघमार्फत आउने गर्दछ,’ उनले भने ।

विश्व तेक्वान्दो महासंघले विश्वभर रहेका केन्द्रीय तथा क्षेत्रीय प्रशिक्षण केन्द्रमध्य १२ औं केन्द्र नेपालमा स्थापना गरेको छ । अध्यक्ष चोएले सोमबार उक्त केन्द्रको उद्घाटन गरेका हुन् । उद्घाटन कार्यक्रममा राष्ट्रिय खेलकुद परिषदका सदस्य सचिव रमेश सिलवाल लगायत संघका पदाधिकारीहरुको उपस्थिति रहेको थियो । यसअघि चीन, अजरबैजान, उज्बेकिस्तान, इरान, चीन, जर्मनी, बेलायत, कोरिया, क्रोएसिया र इटालीमा पनि प्रशिक्षण केन्द्र स्थापना भएका छन् ।

‘हामीले अब विश्व तेक्वान्दोमार्फत नै विभिन्न प्रशिक्षणका कार्यक्रम आयोजना गर्ने बाटो खुलेको छ । नेपाल तेक्वान्दो संघ आफैंले पनि अब विश्व स्तरीय प्रशिक्षण कार्यक्रम संचालन गर्न सक्नेछ । यसले नेपाली तेक्वान्दोको विकासमा टेवा पुर्याउने हाम्रो विश्वास रहेको छ,’ उनले थपे ।

अध्यक्ष चोएले शनिबार नेपाल तेक्वान्दो संघको तेक्वान्दो केयर्स नामक कार्यक्रमको उद्घाटन गर्नुका साथै सम्मान कार्यक्रममा सरिक भएका थिए ।