काठमाडौं (हाम्रो खेलकुद) – प्रधुम्न सिम्खडाले गोकर्ण गल्फ क्लबमा जारी सुर्य नेपाल मन्थ्ली मेडल अन्तर्गत पाँचौ संस्करणको उपाधि जितेका छन् । १९ ह्यान्डीक्यापका सिम्खडाले ११ अन्डर ६१ को नेट स्कोर जोड्दै उपाधि जितेका हुन् ।

दोस्रो स्थानका फिन्त्सो ओङदीले नेट स्कोर ४ अन्डर ६८ तथा तेसोर स्थानका पूर्णबहादुर राईले ३ अन्डर ६९ नेट स्कोर जोडे । टासी दोङले २ अन्डर ७० ग्रास स्कोर जोड्दै उत्कृष्ट ग्रास स्कोरको उपाधि जिते । जुनियरतर्फ १ अन्डर ७१ नेट स्कोरसहित सद्भाव आचार्य च्याम्पियन बने ।

किल ३९ गल्फर सहभागी प्रतियोगिताको मुख्य प्रायोजक सूर्य नेपाल प्रालि रहेको छ । क्लबका अध्यक्ष सुहृद घिमिरेले विजयी खेलाडीलाई पुरस्कृत गरे । प्रतियोगिता स्ट्रोक प्ले फर्म्याटमा फुल ह्यान्डीक्यापमा खेलाइएको थियो ।

डिसेम्बरसम्म १० संस्करणमा हुने यस क्लब प्रतियोगिताको शीर्ष १० स्कोर गर्ने नेटतर्फका खेलाडी, शीर्ष ५ ग्रास र शीर्ष ५ जुनियर खेलाडीले अंक प्राप्त गर्नेछन् । त्यसपछि अंकका आधारमा नेटतर्फ शीर्ष ४०, ग्रासतर्फ शीर्ष १० र जुनियरतर्फ शीर्ष ५ के अर्को दुई चरण खेल्नेछन् । अन्तिम दुई चरण जनवरी र फेब्रुअरी २०२० मा हुनेछ ।

हालसम्म नेटतर्फ प्रधुम्न सिम्खडाले १ सय ७० अंक जोड्दै शीर्ष स्थानमा छन् । ग्रसतर्फ शीर्षस्थानका वाङचेन धोंदुपको ३ सय ३५ अंक छ । जुनियरतर्फ सद्भाव आचार्यले ४ सय अंक जोड्दै दोब्बर अग्रता कायम गरेका छन् ।