काठमाडौं (हाम्रो खेलकुद) – नेपालमा आयोजना हुने एभीसी सेन्ट्रल जोन भलिबल प्रतियोगिताको लागि दोस्रो चरणमा १८ खेलाडी छनोट भएका छन् ।

प्रारम्भिक चरणको २५ सदस्यीय टोलीबाट झन्डै तीन साताको प्रशिक्षणपछि भलिबलका मुख्य प्रशिक्षक हान एबिङले दोस्रो चरणमा १८ खेलाडी छनोट गरेका हुन् । सहायक प्रशिक्षक सुदेश कुमार रिमालले गत १९ असारमै दोस्रो चरणका लागि १८ खेलाडी छनोट गरिएको जानकारी गराए ।

नेपाली टोलीले एक महिनाअघिबाट नेपाली सेनाको कभर्डहल लगनखेलमा नियमित अभ्यास गरिरहेको छ । अन्तिम १२ सदस्यीय टोलीको घोषणा साउन २० गतेसम्म हुन सक्ने प्रशिक्षक रिमालले बताए । पुलिसका रविन चन्द र भीम गाहा मगर, गण्डकी प्रदेशका योकेन्द्र गुरुङ र सुजन चोखाल, प्रदेश ३ का दुर्गा सुनार, आर्मीका भैरव बम र एपीएफका सुरेन्द्र बमले छनोटको दोस्रो चरणमा स्थान बनाउन सकेनन् ।

नेपाली टोली एभीसी सेन्ट्रल जोन र नेपालमै आयोजना हुने १३औं दक्षिण एसियाली खेलकुद (साग) का लागि विशेष प्रशिक्षणमा रहेको छ । संघले गत जेठ १४ गते नै २५ सदस्यीय प्रारम्भिक टोलीको छनोट गरेको थियो । विभागीय कारवाहीका कारण आठौं राष्ट्रिय खेलकुद गुमाएपछि मुख्य स्पाइकर मानबहादुर श्रेष्ठ टोलीबाट बाहिर रहेका छन् । उनी बिच भलिबलका लागि भने छनोट भएका छन् ।

दोस्रो चरणमा रहेका खेलाडीहरु :
धनबहादुर भट्ट क्षेत्री (आर्मी)
विशाल विक (पुलिस)
कुलबहादुर थापा (पुलिस)
राजेन्द्र विष्ट (आर्मी)
टेकराज अवस्थी (एपीएफ)
सारान समरी (आर्मी)
हरिबहादुर अधिकारी (आर्मी)
दुर्गा खड्का (आर्मी)
द्वारिका थापा (पुलिस)
दिपक राज जोशी (पुलिस)
नरेन्द्र गिरि (आर्मी)
राजु शेरचन (पुलिस)
राजकुमार निरौला (एपीएफ)
ईमबहादुर मगर (कप्तान) (पुलिस)
हरिहजुर थापा (आर्मी)
दुर्गा महतो (आर्मी)
विनोद बहादुर चन्द (एपीएफ)
इश्वर थापा मगर (आर्मी)