पोखरा (हाम्रो खेलकुद) – तीनै विभागीय क्लब तथा गण्डकी प्रदेशले महिला तथा पुरुष बीच भलिबलको उपाधि भिडन्तमा स्थान पक्का गरेका छन् ।

पोखरामा जारी सातौं पुरुष राष्ट्रिय बीच भलिबल प्रतियोगिताको फाइनलमा त्रिभुवन आर्मी क्लब ‘ए’ र गण्डकी ‘बी’ ले प्रतिस्पर्धा गर्नेछन् । त्यस्तै छैटौं महिला राष्ट्रिय बीच भलिबलको उपाधिका लागि नेपाल पुलिस क्लब ‘ए’ र नेपाल एपीएफ क्लब ‘ए’ ले भिड्नेछन् ।

विनिता बुढाथोकी र नेविका चौधरीको एपीएफ जोडीले पुष्पा चौधरी र मनीषा चौधरीको पुलिस ‘बी’ को जोडीलाई २१–९, २१–१४ को सोझो सेटमा हराउँदै फाइनलको तय गरेको हो । एपीएफले अब अघिल्लो दिन नै फाइनलमा स्थान पक्का गरेका निता शाह र कोपिला उप्रेतीको जोडीसँग प्रतिस्पर्धा गर्नेछ । शनिबार एपीएफ र पुलिस को खेल १–१ को बराबरीको अवस्थामा वर्षा र खराब प्रकाशका कारण स्थागित गरिएको थियो । आज सुरुबाट भएको सेमिफाइनलमा एपिएफ पूर्ण रुपमा हावी भएको थियो ।

पुरुषतर्फ क्वाटरफाइनलमा मानबहादुर श्रेष्ठ र दिल सुनारको त्रिभुवन आर्मी ‘ए’ ले एपीएफ ए लाई २१-१४,२१-१८ ले पराजित गर्दै सेमिफाइनलमा प्रवेश गरेको थियो । त्यस्तै अर्को खेलमा रमेश केसी र सन्जु विक्रम शाहीको गण्डकी ए ले आर्मी बी लाई २२-२०,१८-२१ र १५-१३ को सेटमा पराजित गरेको थियो । चक्र कुँवर र तोरण चन्दको पुलिस ए ले प्रदेश ३ बी लाई २१-१५ र २१- ९ को सोझो सेटमा पराजित गर्यो । राजु विक र अनिल मगरको गण्डकी बी ले पुलिसको बी टिमलाई ले २१-१२ र २१-१२ को ले पराजित गर्दै सेमिफाइनलमा प्रवेश गरेको थियो ।

आइतबारै भएको पुरुषको पहिलो सेमिफाईनल खेलमा आर्मी ‘ए’ ले गण्डकी ‘ए’ लाई १५-२१,२१-१२ र १५-११ ले पराजित गर्दै फाईनलमा प्रवेश गरेको हो । त्यस्तै अर्को सेमिफाइनल खेलमा गण्डकी बी ले पुलिस ए लाई २१-२३,२१-१८,१५-९ को सेटले पराजित गर्दै आर्मीसँग फाईनल भेट पक्का गरेको हो ।

महिला र पुरुषतर्फ दुवै फाइनल खेल सोमबार हुने आयोजक कास्की जिल्ला भलिबल संघका अध्यक्ष भीम पराजुलीले जानकारी दिए । राष्ट्रिय भलिबल टोलीको बन्द प्रशिक्षणमा समेटिएका खेलाडी सहभागी हुन नपाउने भएपछि टोलीमा नपरेका अनुभवी खेलाडीले बीच भलिबलमा वर्चस्व जमाएका छन् ।