एजेन्सी – पेरिस सेन्ट जर्मेन (पीएसजी) का सुपरस्टार फरवार्ड नेयमार आफ्नै रहरले फ्रान्सेली क्लबमा आबद्ध भएको क्लबका अध्यक्ष नासेर अल खेलिफाले बताएका छन् ।

पछिल्लो समय क्लबसँग सम्बन्ध चिसिएको र अर्को सिजन उनी क्लबमा रहने वा नरहने भन्ने विषयमा चर्चा चलिरहँदा खेलिफाले यस्तो अभिव्यक्ति दिएका हुन् । पीएसजीले सन् २०१७ अगष्टमा २ सय २२ मिलियन युरो कीर्तिमानी ट्रान्सफर रकम तिर्दै उनलाई बार्सिलोनाबाट भित्र्याएको थियो । पीएसजीले यस सिजन नेयमारले क्लब छाड्न चाहेको खण्डमा उक्त रकमभन्दा केहि बढी प्रस्ताव गर्नुपर्ने माग राखेको छ ।

नेयमारले पीएसजीमा पछिल्लो समय लामो समय चोट र सहकर्मी खेलाडीसँग असमझदारीका कारण सुखद समय बिताउन सकेका छैनन् । पछिल्लो सिजन उनको जर्मन मिडफिल्डर जुलियन ड्राक्सलरसँग भनाभन परेको थियो । फ्रेन्च कप फाइनलपछि प्रेस्नेल किम्पेम्बे र अल्फोन्स एरिओलासँग पनि उनले बाझेको खबर निस्किएको थियो । यसैबीच क्लबका अध्यक्ष खेलिफाले अबका दिनबाट क्लबले अनुशासनमा थप कडाइ लगाउने बताएका छन् ।

‘क्लबमा आउने सबैलाई एउटै नियम लागु हुने हो । क्लबको लागि खेलेपछि यसको इज्जत गर्न जान्नुपर्छ । नेयमारलाई यहाँ आउँदा क्लबको भावी योजनाबारे राम्रो जानकारी थियो,’ उनले थपे, ‘ उनलाई यहाँ कसैले जबर्जस्ती गरेर ल्याएको होइन । उनले आफैं पीएसजीको योजना बुझेर क्लबसँग जोडिने चाहना व्यक्त गरेका थिए ।’

नेयमारले क्लब छाड्ने हल्ला चलिरहँदा अर्का युवा फरवार्ड किलियन एम्बाप्पे भने पीएसजीमै रहने पक्का भएको छ । नेयमार चोटका कारण कोपा अमेरिकाबाट बाहिरीएपछि अहिले विश्राममा छन् । उनले अर्को सिजन कहाँबाट खेल्छन् भन्ने टुंगो लागेको छैन । पीएसजीले उचित रकमको प्रस्ताव आएमा उनलाई अन्यत्र जान दिने बुझिएको छ ।