नुवाकोट (हाम्रो खेलकुद) – विभागीय टोली नेपाल पुलिस क्लबले नुवाकोटमा बिहीबारदेखि सुरु भएको प्रथम उपमेयर कप रााष्ट्रिय महिला भलिबल प्रतियोगितामा विजयी शुरुवात गरेको छ ।

प्रतियोगिताको उद्घाटन खेलमा समूह ‘ए’ मा रहेको पुलिसले आयोजक विदुर नगरपलिकामाथि ३–० को सोझो सेटमा जित निकाल्दै विजयी शुरुवात गरेको हो । एकपक्षीय बनेको खेलमा पुलिसले विदुरमाथि २५–९, २५–१५ र २५–१४ को सहज जित निकाल्यो ।

प्रतियोगितामा आयोजक विदुर नगरपालिकासँगै तीन विभागीय टोली नेपाल एपएिफ क्लब, नेपाल पुलिस क्लब र त्रिभुवन आर्मी क्लबको सहभागिता रहेको छ । यस्तै होङगान्जी न्यु डायमण्ड एकेडेमी, सिन्धुपाल्चोक भलिवल टिम र पारामाउन्ट स्कुल कुलेश्वरले पनि प्रतियोगितामा सहभागिता जनाएका छन् ।

सहभागी टोलीलाई दुई समूहमा विभाजन गरिएको छ । समूह ‘ए’ मा आयोजक विदुर नगरपालिका, नेपाल पुलिस क्लब, सिन्धुपाल्चोक र होङगान्जी न्यु डायमन्ड एकेडेमी रहेका छन् । समूह ‘बी’ मा  एपीएफ, त्रिभुवन आर्मी क्लब र पारामाउन्ट स्कुल रहेका छन् । लिग कम नकआउटका आधारमा हुने प्रतियोगिताको दुई समूहका शीर्ष दुई टोलीले सेमिफाइनलमा स्थान बनाउनेछन् ।

विदुर नगरपालिकाको आयोजना, जिल्ला खेलकुद विकास समितिको समन्वय तथा नुवाकोट भलिवल संघको सहयोगमा भएको प्रतियोगिताको विजेताले १ लाख ५० हजार रुपैयाँ हात पार्नेछन् । दोस्रो हुनेले ७५ हजार तथा तेस्रोले ४० हजार रुपैया हात पार्नेछन् । यस्तै प्रतियोगिताको सर्वाेत्कृष्ट खेलाडीले ५ हजार र व्यक्तिगत विधाका स्पाइकर, सेटर, ब्लकर, लिवेरो र सर्भरले जनही ३ हजार पाउने नुवाकोट भलिवल संघका अध्यक्ष सुवास पाण्डेले जानकारी गराए । प्रतियोगिता आगामी असार २ गतेसम्म संचालन हुनेछ ।