काठमाडौं (हाम्रो खेलकुद) – नेपाली राष्ट्रिय फुटबल टोलीका फरवार्ड विमल घर्तीमगरले माल्दिभ्सको शीर्ष श्रेणी क्लब ट्रस्ट एन्ड केयर (टिसी) स्पोर्ट्सबाट सुखद सुरुवात गरेका छन् ।

बुधबार सम्पन्न च्यारिटी सिल्डको दोस्रो लेगमा विमलले दुई गोल गरेपछि टिसीले फोकाइधु फुटबल क्लबलाई ३-१ ले पराजित गर्यो । पहिलो लेगमा १-१ को बराबरीपछि समग्रमा टिसीले जित दर्ता गर्दै सिजनको पहिलो उपाधि हात पारेको हो । विमलले दोस्रो लेगको खेल १-१ को बराबरीमा रहेको अवस्थामा ८ मिनेटको अन्तरमा २ गोल गर्दै टोलीलाई जित दिलाए ।

खेलपछि हाम्रोखेलकुदसँग बोल्दै विमलले टिसीसँग सुखद सुरुवात गर्न पाउँदा खुसी लागेको बताए । ‘ पहिलो प्रतियोगिता नै जित्न पाउँदा निकै खुसी छु । खेल पनि राम्रो भयो । अघिल्लो खेल अवे मैदान भएका कारण केहि कठिन भएको थियो । पहिलो खेलमा टोलीसँग खेल्न केहि कठिन पनि भएको थियो,’ उनले भने ।

उनले अब यसै प्रदर्शनलाई लिगमा पनि निरन्तरता दिंदै उपाधि जित्ने प्रयास रहने बताए । ‘ उपाधिबाट करिअर सुरुवात भएको छ । हाम्रो मुख्य लक्ष्य भनेको लिग उपाधि हो । अब त्यसैको तयारीमा जुट्नेछौं । साविक विजेताको रुपमा लिग खेल्दैछौं, फेरी उपाधि जित्ने लक्ष्य रहनेछ,’ विमलले टुंग्याए ।

टिसीले गत सिजन लिग उपाधि जित्दा नेपाली राष्ट्रिय टोलीका गोलरक्षक किरण चेम्जोङ उत्कृष्ट गोलरक्षक घोषित भएका थिए । उनले यसपटक राष्ट्रिय टोलीको खेललाई प्राथमिकतामा राख्दा टिसीले मौखिक सहमतिका बाबजुद उनलाई अनुबन्ध नगरेको हो ।