काठमाडौं (हाम्रो खेलकुद) – विभागीय त्रिभुवन आर्मी क्लबले झन्डै एकवर्ष अर्काे विभागीय टोली नेपाल पुलिस क्लबसँगको हारको श्रृंखला टुङ्ग्याएको छ ।

करिव एक वर्ष दौरान आर्मीले पुलिससँग ६ फाइनलमा हार बेहोरेको थियो । त्यो हारको श्रृंखलालाई आर्मीले शुक्रबार चौथो संस्करणको प्रधानसेनापति राष्ट्रिय पुरुष भलिबल प्रतियोगिताको सेमिफाइनलमा पुलिसलाई ३–१ ले हरादै टुङ्ग्याएको हो । एक वर्षे दौरानको आर्मीले सातौं खेलमा पुलिसलाई हराएको हो ।

गत वर्ष जेठमा भएको प्रथम सभामुख कप राष्ट्रिय पुरुष भलिबल च्याम्पियनसिप यता आर्मीले पुलिसलाई पराजित गर्न सकेको थिएन । आर्मी सबै प्रतियोगिताको फाइनलमा पुलिससँग पराजित भएको थियो । आर्मी प्रथम सभामुख कप, दोस्रो सभामुख कप, चितवनमा भएको आमन्त्रण पुरुष भलिबल प्रतियोगिता, चितवनको माडीमा भएको राष्ट्रिय पुरुष भलिबल प्रतियोगिता, आठौं राष्ट्रिय खेलकुद र पाथिभारा राष्ट्रिय पुरुष भलिबल च्याम्पियनसिपको सबै खेलको फाइनलमा पुलिससँग पराजित भएको थियो ।

शुक्रबार आर्मीको घरेलु मैदान सैनिक तालिम तथा खेलकुद केन्द्र लगनखेलमा भएको निकै प्रतिस्पर्धात्मक बनेको खेलमा आर्मीले पहिलो सेट १९–२५ ले गुमाएको थियो । त्यसपछि आर्मीले उत्कृष्ट पुनरागमन गर्दै सबै तीन सेट आफ्नो पक्षमा पार्न सफल भयो । दोस्रो सेटमा १६–२१ को अवस्थामा पछि रहँदा आर्मीले उत्कृष्ट पुनरागमन गर्दै २८–२६ को जित निकाल्दै खेलमा फर्किएको थियो । तेस्रो सेटमा २१–१९ को अग्रता लिएर पनि आर्मी हार नजिक पुगेको थियो । तर, आर्मीले पुलिसलाई २४ अंकमा रोक्दै २६–२४ को जित जित निकाल्यो । चौथो सेटमा भने आर्मीले २५–१७ को जित निकाल्दै फाइनलमा पुग्न सफल भयो ।

आर्मी यस प्रतियोगितामा लगातार चौथोपटक फाइनलमा पुग्न सफल भएको हो । यसअघिको तीनै संस्करणको च्याम्पियन आर्मीले फाइनलमा विभागीय गण्डकी प्रदेशको सामना गर्नेछ । गण्डकीले विभागीय नेपाल एपीएफ क्लबलाई ३–१ को सेटमा पराजित गर्दै फाइनलमा स्थान बनाएको थियो । आर्मी र गण्डकीबीचको फाइनल सोमबार हुने आयोजक नेपाली सेनाले जनाएको छ ।