नेपाल खेलकुद पत्रकार मञ्च कास्की समन्वय शाखाद्वारा आयोजित प्रथम पोखरा स्पोर्टस अवार्ड वर्ष उत्कृष्ट खेलाडी २०७२ बाट फुटबलका हेमन गुरुङ र मञ्जु गुरुङ सम्मानित भएका छन् ।

नेपाली राष्ट्रिय फुटबल टिमका हेमन गुरुङले वर्ष खेलाडीबाट सम्मानित हुने क्रममा शारीरिक सुगठनका सुरेश गुरुङ र आर्चरीका असिम शेरचनलाई पछि पारे । १२ औं दक्षिण एसियाली खेलकुद (साग) मा फुटबलले स्वर्ण जित्दा हेमन टिमका सदस्य हुन् । 

महिला वर्ष खेलाडीबाट भलिबलकी चर्चित खेलाडी मञ्जु गुरुङ सम्मानित भएकी छिन् । यो विधामा मञ्जुसँगै भलिबलकी अर्की खेलाडी अरुणा शाही र उसुकी झरना गुरुङ मनोनयनमा परेका थिए । १२ सागमा महिला भलिबलले नेपाललाई कास्य पदक दिलाउँदा मञ्जु टिमकी महत्वपूर्ण खेलाडी थिइन् । उत्कृष्ट खेलाडीद्वय मञ्जु र हेमनलाई २५–२५ हजार प्रदान गरिएको छ ।
पछिल्लो पाँच वर्ष राष्ट्रिय टिममा पु¥याएको योगदान र २०७२ सालको प्रदर्शनको आधारमा विजेता चुनिएको हो । लाइफ टाइम अचिभमेन्ट अवार्डबाट नेपाली राष्ट्रिय फुटबल टोलीका पूर्व प्रशिक्षक एवंम् खेलाडी सम्मानित भएका छन् । थापा नेपालले सन् १९८४ मा पहिलो दक्षिण एसियाली महासंघिय खेलकुद (साफ) मा नेपालले स्वर्ण पदक जित्दाका सदस्य हुन् । सम्मानपश्चात भावुक बनेका थापाले आप्mनो जन्मस्थानमा पाएको यो सम्मान जीवनको ठूलो उपलब्धि भएको बताए । वर्ष प्रशिक्षकबाट कराँतेका सुरेन्द्र गुरुङ सम्मानित भएका छन् । यो विधामा भलिबलकी कौशिला खत्री र फुटबलका शम्भु केसी मनोनयनमा परेका थिए । भलिबल तथा एथलेटिक्स खेलाडी शशी चौधरी नवप्रतिभा पुरस्कारबाट सम्मानित भएकी छिन् । उनलाई १० हजार प्रदान गरिएको छ ।
आगामी वर्षदेखि यो कार्यक्रम आयोजनाका लागि राष्ट्रिय खेलकुद परिषद्ले एक लाख उपलब्ध गराउने सदस्यसचिव केशवकुमार विष्टले बताएका छन् । नेपाल खेलकुद पत्रकार मञ्चको केन्द्रसँगको समन्वयनमा कास्कीले पहिलोपटक स्पोर्टस अवार्ड आयोजना गरेको हो । अवार्डका लागि मञ्चका केन्द्रिय अध्यक्ष महेश आचार्य पोखरा पुगेका थिए ।