काठमाडौं (हाम्रो खेलकुद) – विभागीय त्रिभुवन आर्मी क्लबको पुरुष भलिबल टोलीका कप्तान तथा नेपाली राष्ट्रिय पुरुष भलिबल टोलीका स्टार स्पाइकर मानबहादुर श्रेष्ठ
विभागीय कारवाहीपछि टोलीमा फर्किएका छन् ।

मानबहादुरले नेपाली सेनाको आयोजनामा हुने चौथो प्रधानसेनापति कप पुरुष राष्ट्रिय भलिबल प्रतियोगिताबाट पुनरागमन गर्न लागेका हुन् । प्रधानसेनापति भलिबल १९ जेठबाट २३ जेठसम्म लगनखेलमा आयोजना हुँदैछ । स्वीकृतिविनै मैत्रीपुर्ण खेल खेल्न जापान गएको भन्दै मानबहादुरलाई विभागीय कारवाही गरिएको थियो । कारवाही स्वरुप मानबहादुरले आठौं राष्ट्रिय खेलकुद र ताप्लेजुङमा भएको पाथिभारा पुरुष भलिबल प्रतियोगिता गुमाएको थिए ।

आर्मीका प्रशिक्षक तथा वरिष्ठ भलिबल प्रशिक्षक कपिलकिशोर श्रेष्ठले मानबहादुर टोलीमा फर्किएको बताएका छन् । विभागले भन्दा पनि मानलाई आफ्नै गणले सामान्य कारवाही गरेको जानकारी गराउँदै प्रधानसेनापति भलिबलमा उनी उपलब्ध हुने बताएका छन् । उनले टिमसँगै प्रशिक्षण थालिसकेका छन् । मानबहादुरको आगमनसँगै टिम सन्तुलित हुने प्रशिक्षक श्रेष्ठले बताए ।
मानबहादुर टिममा नरहेसँगै आर्मी केही कमजोर जस्तै देखिएको थियो । पछिल्लो दुई प्रतियोगिताको फाइनलमा मानबहादुर विनाको आर्मी पुलिससँग पराजित हुदै उपाधि विमुख बनेको थियो ।

मानबहादुरले यसअघि नै आफू स्वीकृतिविना नै जापान खेल्न जानु आफ्नो बाध्यता रहेको बताइसकेका थिए । ‘यो प्रतियोगिताको लागि ६ महिनाअघि देखि नै तयारी रहेको थियो । आयोजक समितिले निकै खर्च गरिसकेको र वचन दिइसकेको र आठौं लगातार सरेपछि नै समस्या भएको हो । आठौको भलिबल खेल तालिका सार्वजनिक भए मैले समूह चरणको केहि खेल मात्र गुमाउने स्वीकृतिको लागि आग्रह गरेपनि विभागबाट स्वीकृति नआएपछि आठौं छाड्न बाध्य भएको बताएका थिए ।