काठमाडौं (हाम्रो खेलकुद) – नेपाल भलिबल संघले न्यु डायमन्ड एकेडेमी नैकापमा दोस्रो ‘भलिबल डे’ मनाएको छ । पहिलो संस्करण पनि न्यु डायमन्डमै भएको थियो ।

दोस्रो भलिबल दिवस सांसद कृष्ण गोपाल श्रेष्ठ, पूर्व खेलकुद मन्त्री दलजित विके श्रीपाइली, नेपाल भलिबल संघका अध्यक्ष मनोरन्जनरमण शर्मा मदन भण्डारी स्पोर्टस एकेडेमीका पदाधिकारी लगायतले बेलुन उडाएर सेलेब्रेसन सुरु गरे । नेपाल सरकारले २०७४ जेठ ८ गते भलिबललाई राष्ट्रिय खेल घोषित गरेपछि संघले प्रत्येक वर्ष जेठ ८ गते भलिबल दिवस मनाउने निर्णय गरेको थियो ।

भलिबल दिवसकै अवसरमा एपीएफ, न्यु डायमन्ड र गण्डकी प्रदेशका खेलाडी सहितको ‘ए’ र ‘बी’ टोलीबीच भलिबल सेलेब्रेसन मैत्रीपुर्ण खेल भएको थियो । जसमा ‘ए’ टोली २५–१६ ले विजयी भएको । ‘ए’ को कप्तानी प्रतिभा माली तथा ‘बी’ को कप्तानी रेश्मा भण्डारीले गरेकी थिइन् ।

दुई वर्षअघि तत्कालिन माओवादी केन्द्रका अध्यक्ष श्री पुष्पकमल दाहाल (प्रचण्ड) प्रधानमन्त्री रहँदा र माओवादी केन्द्रकै दलजित विके श्रीपाइली युवा तथा खेलकुद मन्त्री भएको कार्यकालमा नेपाल सरकारले जेष्ठ ८ गते भलिबललाई नेपालको राष्ट्रिय खेल घोषणा गरेको थियो । सोही दिनलाई सम्झना गर्दै संघले जेठ ८ लाई भलिबल दिवसको रुपमा मनाउदै आएको छ ।