काठमाडौं (हाम्रो खेलकुद) – भारतको गुवाहटीमा जारी दोस्रो इन्डियन ओपन इन्टरनेसनल बक्सिङ प्रतियोगितामा नेपाली माला राई भारतकी मेरी कोमसँग पराजित भएकी छिन् ।

मंगलबार भएको महिला ५१ केजी तौल समूहको खेलमा मेरी कोमले मालालाई ५-० ले पराजित गरिन् । नेपालकी माला राई सुरुवाती राउन्डदेखि नै रक्षात्मक रुपमा उत्रेकी थिइन् । माला घरेलु बक्सिङमा एपीएफबाट खेल्ने गर्छिन् । उनले आठौं राष्ट्रिय खेलकुदमा रजत पदक जितेकी थिइन् । त्यसअघि राजधानीमा भएको गणेशमान बक्सिङमा भने उनले आफ्नो तौल समूहमा स्वर्ण हात पारेकी थिइन् ।

यसअघि ४८ केजी तौल समूहमा प्रतिस्पर्धा गर्दै आएकी मेरी कोमले यसै प्रतियोगिताबाट ५१ केजीमा प्रतिस्पर्धा गर्न सुरु गरेकी हुन् । टोकियो ओलम्पिकमा ४८ केजी तौल समूह नहुने भएपछि मेरी कोमले आफूलाई नयाँ तौल समुहका लागि तयार गरेकी हुन् ।

नेपालका लागि महिला ६४ केजी तौल समूहमा आज नै पुनम रावलले भारतकी प्विलाओ बसुमत्रीको सामना गर्दैछिन् । महिला ५४ केजी समूहमा मिनु गुरुङले पनि प्रतिस्पर्धा गर्दैछिन् ।

नेपालबाट सोमबार भएको पहिलो दिनको खेलमा संगीता सुनार र चन्द्रकला थापा पराजित बाहेक थिए । संगीता ६० केजी तौल समूहमा भारतकी प्रिती बेनिवलसँग पराजित भइन् । चन्द्रकला ५७ केजी तौल समूहमा सोनिया लाथरसँग हारेकी थिइन् । पुरुषतर्फ सुरेन्द्र राईले थाईल्यान्डका चात्चाई देचासँग हार बेहोरे ।

नेपालबाट ११ खेलाडीले प्रतियोगितामा सहभागिता जनाउँदै छन् ।