काठमाडौं (हाम्रो खेलकुद) – एमेच्योर गल्फर शुक्रबहादुर राईले सूर्य नेपाल प्रिमियर गल्फ च्याम्पियनसिपको उपाधि जितेका छन् । शुक्रले व्यावसायिक गल्फर भुवन नगरकोटीलाई १ स्ट्रोकले हराउँदै सिजनको दोस्रो उपाधि हात पारेका हुन् । भुवन उपाधिविहिन भएपनि नेपालका नम्बर १ गल्फर बन्न भने सफल रहे ।

बिहीबार गोकर्ण गल्फ कोर्षमा शुक्रले ५ अन्डर ६७ को प्रदर्शन गर्दै समग्रमा ११ अन्डर २ सय ७७ स्कोरसाथ आफ्नो अघिल्लो दिनको अग्रता कायम राखे । भुवनले पनि ५ अन्डर ६७ कै प्रदर्शन गरे । उनी समग्रमा १० अन्डर २ सय ७८ को प्रदर्शन गर्दै व्यावसायिकतर्फ प्रथम भए । उनले २ लाख ३० हजार रुपैयाँ जिते । व्यावसायिकतर्फ दोस्रो स्थान हासिल गरेका विकास अधिकारीले १ लाख ४० हजार रुपैयाँ पाए । विकासले समग्रमा इभन पार २ सय ८८ स्कोर जोडेका थिए । एमेच्योरतर्फ ५ अन्डर २ सय ८३ स्कोर जोडेका सुवास तामाङ दोस्रा भए ।

टुरमा समग्रमा ६ लाख ३० हजार रुपैयाँ पुरस्कार प्राप्त गरेका भुवन नगरकोटी नयाँ नम्बर १ गल्फर बने । पछिल्ला ४ इभेन्टमा सहभगिता नजनाएका शिवराम श्रेष्ठ ४ लाख ६० हजार ५ सय रुपैयाँसहित दोस्रो वरीयतामा रहे । तेस्रो वरीयतामा विकास अधिकारीले ४ लाख ११ हजार ३ सय ३३ रुपैयाँ जिते । संजय लामा चौथो (३,८६,५००) र धनबहादुर थापा पाँचौ (३८१,१६७) भए ।

प्रतियोगितामा ४० व्यावसायिक र २० एमेच्योर गल्फरसहित कुल ६० जनाले प्रतिस्पर्धा गरिरहेका थिए । सर्वाधिक पुरस्कार राशीको प्रिमियर प्रतियोगिताको विजेताले २ लाख ३० हजार रुपैयाँ र उपविजेताले १ लाख ४० हजार तथा शीर्ष २४ व्यावसयिक खेलाडीले नगद पुरस्कार प्राप्त गरे । प्रतियोगिताको कुल पुरस्कार राशी १२ लाख ६० हजार रहेको थियो । विजयी खेलाडीलाई सूर्य नेपाल प्रालिका प्रबन्ध निर्देशक अभिमन्यु पोद्दार, मार्केटिङ विभागका उपाध्यक्ष दिप्रा लहिरी, नेपाल गल्फ संघका अध्यक्ष टासी घले र एनपीजीए सल्लाहकर घनश्याम थापा लगायतले पुरस्कृत गरे ।