काठमाडौं (हाम्रो खेलकुद) – युवा एमेच्योर सुवास घिसिङले सूर्य नेपाल प्रिमियर गल्फ च्याम्पियनसिपको दोस्रो दिन अग्रता लिएका छन् ।

गोकर्ण गल्फ कोर्समा मंगलबार लगातार दोस्रो दिन तीन अन्डर ६९ को प्रदर्शन गरेपछि सुवास शीर्षस्थानमा पुगे । अघिल्लो दिन ४ अन्डर ६८ सहित शीर्ष स्थानमा रहेका जयरामले दोस्रो दिन इभन पार ७२ खेलेपछि सुवास अगाडी बढेका हुन् । सुवासको कुल स्कोर ६ अन्डर १३८ पुगेको छ ।

दोस्रो स्थानमा जयराम श्रेष्ठ र अर्का एमेच्योर शुक्रबहादुर राई २ स्ट्रोक पछि छन् । शुक्रले मंगलबार ६ अन्डर ६६ को उत्कृष्ट स्कोर प्रदर्शन गरे । जयराम र शुक्र दुवैको कुल स्कोर ४ अन्डर १४० को छ । चौथो स्थानमा ५ अन्डर ६७ को प्रदर्शन गरेका रमेश अधिकारीको कुल ३ अन्डर १४१ स्कोर छ । संयुक्त पाँचौमा भुवन नगरकोटी र धनबहादुर थापाको समग्र स्कोर २ अन्डर १४२ छ ।

प्रतियोगितामा ४० व्यावसायिक र २० एमेच्योर गल्फरसहित कुल ६० जनाले प्रतिस्पर्धा गरिरहेका छन् । सर्वाधिक पुरस्कार राशीको प्रिमियर प्रतियोगिताको विजेताले २ लाख ३० हजार रुपैयाँ प्राप्त गर्नेछन् । उपविजेताले १ लाख ४० हजार तथा शीर्ष २४ व्यावसयिक खेलाडीले नगद पुरस्कार प्राप्त गर्नेछन् । प्रतियोगिताको कुल पुरस्कार राशी १२ लाख ६० हजार रहेको छ ।