काठमाडौं (हाम्रो खेलकुद) – जयराम श्रेष्ठले सूर्य नेपाल प्रिमियर गल्फ च्याम्पियनसिप २०१९ को पहिलो दिनको खेलमा अग्रता लिएका छन् ।

गोकर्ण गल्फ क्लबमा जारि प्रतियोगिताको पहिलो दिन जयरामले ४ अन्डर ६८ स्कोर जोड्दै दोस्रो स्थानका एमेच्योर सुवास घिसिङसँग १ स्ट्रोकको अग्रता कायम गरे । जयरामले फ्रन्ट नांमा ४ अन्डर ३२ र ब्याक नाइनमा इभन पर ३६ को प्रदर्शन गरे । उनले तेस्रो होलमा इगल तथा पाँचौ, सातौं, नवौं र १८ औं गोलमा बर्डी खेल्दा चौथो होलमा भने बोगी खेपे । दोस्रो स्थानका सुवासले फ्रन्ट नाइनमा २ अन्डर ३४ र ब्याक नाइनमा १ अन्डर ३५ स्कोर जोडे ।

संयुक्त तेस्रो स्थानमा सूर्यप्रसाद शर्मा, कृष्णमान राजबाहक र चुडाबहादुर भण्डारी छन् । तीनै खेलाडीले २ अन्डर ७० स्कोर जोडेका छन् । संयुक्त छैटौंमा रामे मगर, विकास अधिकारी र एमेच्योर टाँकबहादुर कार्कीले १ अन्डर ७१ स्कोर बनाएका छन् ।

प्रतियोगितामा ४० व्यावसायिक र २० एमेच्योर गल्फरसहित कुल ६० जनाले प्रतिस्पर्धा गरिरहेका छन् । सर्वाधिक पुरस्कार राशीको प्रिमियर प्रतियोगिताको विजेताले २ लाख ३० हजार रुपैयाँ प्राप्त गर्नेछन् । उपविजेताले १ लाख ४० हजार तथा शीर्ष २४ व्यावसयिक खेलाडीले नगद पुरस्कार प्राप्त गर्नेछन् । प्रतियोगिताको कुल पुरस्कार राशी १२ लाख ६० हजार रहेको छ ।