काठमाडौं (हाम्रो खेलकुद) – साविकको विजेता नेपाल पुलिस क्लब र त्रिभुवन आर्मी क्लब तेस्रो संस्करणको पाथीभरा राष्ट्रिय पुरुष भलिबल प्रतियागिताको क्वाटरफाइनलमा प्रवेश गरेका छन् ।

ताप्लेजुङको साँघुमा सोमबार पुलिसले प्रदेश नम्बर १ र आर्मीले त्रिभुवन विश्वबिद्यालय टिमलाई पराजित गर्दै क्वाटरफाइनलको यात्रा तय गरेको हो । नारायणी माविको खेल मैदानमा भएको पहिलो खेलमा प्रदेश नम्बर १ लाई ३–० को सोझो सेटमा पराजित गर्दै पुलिस समूह ‘ए’ बाट अन्तिम आठमा पुग्न सफल भएको हो ।

पुलिसले प्रदेश १ लाई २५–८, २५–१८ र २५– ९ को सेटमा हरायो । प्रतियोगितामा ८ टोली सहभागी भएको कारण प्रदेश १ पनि क्वाटरफाइनलमा पुग्न सफल भयो । यस्तै आर्मीले विश्वबिद्यालय टिमलाई ३–० को सोझो सेटमा नै पराजित हरायो । आर्मीले विश्वविद्यालयमाथि २५–१३, २५–१३ र २५–१५ को सेटमा पाखा लगायो ।

जलजले युवा क्लबको आयोजनामा जारी प्रतियोगिता अन्तर्गत सोमबार एपीएफले प्रदेश ३ लाई २५–१६,२५–१५ र २६–२४ को सेटमा हरायो । त्यस्तै गण्डकी प्रदेशले प्रदेश २ लाई ३–० को सोझो सेटमा पराजित गर्दै क्वाटरफाइनलमा स्थान पक्का बनायो । गण्डकीले प्रदेश २ लाई २५–१६,२५–१५ र २५–१६ को सेटमा हरायो ।

क्वाटरफाइनलमा पुलिसले मंगलबार प्रदेश ३, आर्मीले प्रदेश नम्बर एपीएफले प्रदेश १ र गण्डकीले विश्वव्द्यिालयसँग प्रतिस्पर्धा गर्नेछन् । प्रतियोगितामा ८ टोलीको मात्रै सहभागिता रहेका कारण पराजित भएका टोलीले पनि क्वाटरफाइनलमा थान बनाएको हो ।

प्रतियोगिताको विजेताले नगद ३ लाख ५१ हजार ५ सय प्राप्त गर्नेछ । यस्तै उपविजेताले १लाख ७६ हजार २५१ नगद प्राप्त गर्नेछन् । सेमिफाइनलमा पराजित दुई टोलीले नगद ५०–५० हजार पाउने आयोजकले जनाएको छ । प्रतियोगिताको सर्वोत्कृष्ट खेलाडीले १५ हजार रुपैया तथा व्यक्तिगत विधामा उत्कृष्ट हुने सर्भर, डिफेन्डर, ब्लकर, क्विकर, स्पाइकर र प्रशिक्षकले समान ७–७ हजार पाउने छन् ।