एसियन च्याम्पियनसिपमा सोम सेमिफाइनलमा रोकिए

काठमाडौं (हाम्रो खेलकुद) – कतारमा जारी २३औं एसियन एथलेटिक्स च्याम्पियनसिप अन्तर्गत पुरुष ८०० मिटरमा नेपालका सोमबहादुर कुमाल सेमिफाइनलमा रोकिएका छन् ।

कतारको दोहास्थित खालिफा रंगशालामा सोमले हिटर चरण पार गर्दै सेमिफाइनलमा प्रवेश गरेपनि त्यो भन्दा अघि बढ्न सकेनन् । हिट चरणमा ३२ खेलाडीबाट उनले नवौं स्थानसहित सेमिफाइनलमा स्थान बनाएका थिए । तर, एसियन एथलेट स्टारहरु रहेको सेमिफाइनलमा उनले सोचेअनुरुपको प्रदर्शन गर्न सकेनन् ।

हित चरणमा सोमले निर्धारित दुरी १ मिनेट ५२.०४ सेकेन्डमा रेस पूरा गरे । सेमिफाइनलमा भने उनले १ मिनेट ५३.२२ सेकेन्ड लगाएका थिए ।

सोमले हाम्रो खेलकुदसँग कुराकानी गर्दै सेमिफाइनलसम्म स्थान बनाउनु पनि राम्रो रहेको प्रतिक्रिया दिए । उनले हिट लगत्तै सेमिफाइनल खेल्नुपर्दा पनि सोचेजस्तो हुन नसकेको बताए । उनले यस्ता खालका अन्तर्राष्ट्रिय प्रतियोगिता आवश्यक रहेको र यस्ता खालका च्याम्पियनसिपले म्याच एक्सपोजर बढ्ने समेत थपे ।

एसियन एथलेटिक्स च्याम्पियनसिपमा सोमसहित अजित कुमार यादवले पनि सहभागी छन् । अजितले बुधबार ५००० मिटर दौडमा प्रतिस्पर्धा गर्दैछन् ।