नेपालगन्ज (हाम्रो खेलकुद) – आठौं राष्ट्रिय खेलकुद अन्तर्गत पुरुष भलिबल प्रतियोगितामा विभागीय नेपाल पुलिस क्लब समूह ‘ख’ को विजेता बन्दै सेमिफाइनलमा प्रवेश गरेको छ ।

खजुरास्थित भलिबल कोर्टमा आइतबार भएको समूह चरणको अन्तिम खेलमा पुलिसले प्रदेश १ माथि ३–१ को जित निकाल्दै समूह विजेता बनेको हो । पुलिस समूह चरणमा अपराजित रहन सफल भयो । पुलिसले चार खेलबाट ११ अंक जोड्यो । पुलिसको जितसँगै यो समूहबाट एपीएफ समूह उपविजेताको रुपमा अन्तिम चारमा पुग्न सफल हुँदा प्रदेश १ र सुदुरपश्चिम प्रदेश समूह चरणबाटै बाहिरिए ।

खजुरामा भएको खेलमा पुलिसले पहिलो र दोस्रो सेट क्रमश: २५–१३ र २५–२० ले आफ्नो पक्षमा पारेको थियो । तेस्रो सेट १७–२५ ले गुमाएपनि प्रतिस्पर्धात्मक बनेको चौथो सेट पुलिसले २७–२५ ले जित्न सफल भयो ।

अर्काे समूहको खेलमा प्रदेश ३ ले प्रदेश २ माथि २५–१७, २५–२१ र २५–१० को सहज जित निकाल्यो । समुह ‘क’ मा आज साँझ सुदुरपश्चिम र प्रदेश ५ तथा समूह ‘ख’ मा कर्णली प्रदेश र गण्डकी प्रदेशबीच खेल हुनेछ ।

महिलातर्फ प्रदेश ३ र एपीएफले लगातार तेस्रो जित निकालेको छ । प्रदेश ३ ले कर्णली प्रदेशलाई २५–४, २५–१२ र २५–१८ को तथा एपीएफले सुदुरपश्चिम प्रदेशलाई २५–८, २५–१३ र २५–१० को सोझो सेटमा पाखा लगायो । दुवै टोली अपराजित छन् ।

महिलातर्फ साँझ आर्मी र गण्डकी प्रदेश तथा प्रदेश ५ र नेपाल पुलिस क्लबबीच प्रतिस्पर्धा हुनेछ ।