नेपालगन्ज (हाम्रो खेलकुद) – आठौं राष्ट्रिय खेलकुदको अनन्तः बिहीबार औपचारिक उद्घाटन भएको छ । राष्ट्रपति विद्यादेवी भण्डारीले बिहीबार साँझ नेपालगन्ज रंगशालामा उद्घाटन गरेसँगै दुई दशकभन्दा लामो समयपछि नेपालगन्जमा राष्ट्रिय खेलकुद सरु भएको छ । यसअघि २०५४ मा चौथो राष्ट्रिय खेलकुद नेपालगन्जमा आयोजना भएको थियो ।

दुई घन्टा भन्दा समय सम्म चलेको उद्घाटन सत्रमा सहभागी ११ टोलीका खेलाडीले मार्च पास गर्नुका साथै स्थानिय विभिन्न संस्थाबाट झाकी प्रदर्शन गरिएको थियो । खेलकुदमा ७ प्रदेश , ३ विभाग (नेपाली सेना, नेपाल प्रहरी, शसस्त्र प्रहरी बल) र एनआरएनको टोलीको सहभागिता रहेको छ । देश संघियतामा गएयता राष्ट्रिय खेलकुद पहिलोपटक आयोजना भएको हो । त्यसैले पहिलोपटक प्रदेश टोलीको सहभागिता रहेको छ । एनआरएन टोलीलाई पनि पहिलो पटक सहभागि हुने मौका दिइएको छ । एनआरएनले ९ खेलमा २४ खेलाडीलाई व्यक्तिगत स्पर्धामा उतारेको छ ।

राष्ट्रपति भण्डारीले खेलकुदको विकासका लागि विद्यालयस्तरदेखि नै ध्यान दिनु पर्नेमा जोड दिइन् । स्थानीय तहले खेलकुदको विकासका लागि ध्यान दिनु, सुखी नेपाली, समृद्ध नेपालको अभियानमा खेलकुदले अहम भूमिका खेल्ने बताउदै राष्ट्रपति भण्डारीले खेलाडीको बृत्ति विकासमा ध्यान दिनु पर्ने बताइन् ।

युवा तथा खेलकुदमन्त्री जगतबहादुर विश्वकर्माले विभिन्न चुनौती र प्रतिकूलताका बाबजुद आठौंलाई निर्धारित समयमा गर्न सकिएको बताए । उनले खेलकुदको विकास नभई समृद्ध नेपालको परिकल्पना गर्न नसकिनेमा जोड दिए । ‘पेशा, व्यवसाय, उद्योगको रुपमा खेललाई विकास गर्नुपर्छ। खेल पर्यटनको माध्यमबाट अर्थतन्त्रमा महत्वपूर्ण योगदान रहन्छ’, खेलकुदमन्त्री विश्वकर्माले भने, खेलकुदमा लगानी बढाउन आवश्यक छ ।’

५ नम्बर प्रदेशका मुख्यमन्त्री शंकर पोखरेलले खेलले सामुहिकता, मिलजुलको संस्कृति र राष्ट्रिय भावनाको जगाउने भएकाले प्राथमिकता दिनु पर्ने बताए। उनले प्रदेशका एक सय नौ वटै पालिकामा खेल मैदानको अवधारणा लिएर अघि बढेको जानकारी दिए । राखेपका सदस्य सचिव केशवकुमार विष्टले आठौंका लागि बनेका अन्तर्राष्ट्रिय स्तरका पूर्वाधारले प्रतिभा जन्माउन मद्दत र्पुयाउने विश्वास गरे ।

औपचारिक उद्घाटन बिहीबार भएपनि विभिन्न प्रतियोगिता चैत २७ गतेबाट सुरु भएको थियो । ३५ मध्ये १५ खेल बिहीबार सम्म सकिएका छन् । नेपालगञ्जलाई केन्द्रविन्दुमा राखेर आयोजना भएको राष्ट्रिय खेलकुदका खेल बाँके, बर्दिया, दाङ, रुपन्देही र कपिलबस्तुमा आयोजना भइरहेका छन् । युथ ओलम्पियन जुडो खेलाडी सोनु भट्ट र निर्णायकका तर्फबाट भारोत्तोलनका समसुद्दिन सिद्धिकीले शपथ लिएका थिए ।

राष्ट्रिय खेलकुदका लागि नेपालगञ्जमा रंगशालामा पोर्टेबल भिआइपी प्यारापिट निर्माण गरिएको छ । त्यस्तै मैदानमा बर्मुडा घाँस रोपिएको छ । सोही मैदानमा विभिन्न स्थानिय झाँकी, जातजातीका सांस्कृतिक पहिचान झल्किने पहिरन, नाच प्रदर्शन गरिएको थियो । उद्घाटनको अन्त्यमा जोडदार आतिसबाजी गरिएको थियो ।

१३ ओलम्पियनहरुले ओलम्पिक टर्च दौडमा भाग लिएका थिए भने प्रदेश सांसद समेत रहेका ओलम्पियन सुरेन्द्र हमालले ओलम्पिक टर्चमार्फत आठौं राष्ट्रिय खेलकुदको दीप प्रज्वलन गरेका थिए । २०३८ सालमा सुरु भएको राष्ट्रिय खेलकुद २०४० र २०४२ मा प्रत्येक दुई वर्षमा आयोजना भएको थियो । तर, त्यसपछि भने निर्धारित २ वर्षमा राष्ट्रिय खेल हुन सकेन । २०५४ मा चौथो, २०६५ मा पाँचौं, २०६८ मा छैटौं र २०७३ मा सातौं राष्ट्रिय खेलकुद आयोजना भएको थियो ।

उद्घाटन समारोहका तस्बिरहरु यहाँ हेर्नुहोस्