हक्की : पुलिसको फराकिलो जितसँगै सेमिफाइनल समीकरण पूरा

नेपालगन्ज (हाम्रो खेलकुद) – आठौं राष्ट्रिय खेलकुदअन्तर्गत लिग चरणको अन्तिम खेलमा नेपाल पुलिस क्लबले प्रदेश २ लाई ६-० ले पराजित गर्दै समूह ‘ए’ को विजेताको रुपमा सेमिफाइनलमा स्थान पक्का गरेको छ ।

सोमबार मंगल प्रसाद माविको खेलमैदानमा रोमन रानाले ४ गोल गरेपछि पुलिसले सहज जित दर्ता गर्यो । रोमनको २१ औं मिनेटको गोलमा पुलिसले पहिलो हाफमा १-० को अग्रता लिएको थियो । दोस्रो हाफमा भने पुलिसले ५ गोल थप्यो ।

रोमनले दोस्रो हाफको ३६ औं मिनेटमा नै गोल गर्दै पुलिसको अग्रता दोब्बर पारे । योगेश कुमारले ३८ औं मिनेटमा गोल थपे । रोमनले त्यसको ७ मिनेटपछि दुई मिनेटको अन्तरमा दुई गोल गर्दै पुलिसलाई ५-० को अग्रता दिलाए । ५३ औं मिनेटमा केशवराज जोशीले पेनाल्टी कर्नरको सदुपयोग गर्दै पुलिसको फराकिलो जित पक्का गरे ।

यस जितसँगै पुलिस समूह ए को विजेताको रुपमा सेमिफाइनलमा प्रवेश गरेको छ । समूह ए बाट त्रिभुवन आर्मी उपविजेता बन्दै अन्तिम ४ मा प्रवेश गर्यो । समूह बी बाट प्रदेश ५ समूह विजेता र सुदूरपश्चिम उपविजेता बनेको छ । मंगलबार हुने पहिलो सेमिफाइनलमा पुलिस र प्रदेश ७ तथा दोस्रोमा प्रदेश ५ र आर्मी भिड्नेछन् ।