काठमाडौं (हाम्रो खेलकुद) – विभागीय त्रिभुवन आर्मी क्लबका कीर्तिमानी खेलाडी सोमबहादुर कुमालले आठौं राष्ट्रिय खेलकुद गुमाउने भएका छन् ।

कतारको दोहामा हुन लागेको एशियन एथलेटिक्स च्याम्पियनसिपमा सहभागिता जनाउने पक्का भएपछि सोमले आठौं राष्ट्रिय खेलकुद गुमाउने भएका छन् । एशियन एथलेटिक्स च्याम्पियनसिप र आठौं राष्ट्रिय खेलकुद अन्तर्गतको एथलेटिक्सको मिति जुधेका कारण सोमले आठौ गुमाउने भएका हुन् ।

एसियन च्याम्पियनसिप अप्रिल २१ देखि २४ तारिखसम्म आयोजना हुँदैछ । आठौंको एथलेटिक्स १८ देखि २२ अप्रिलमा हुँदैछ । टोली २० अप्रिलमा कतार जाने तालिका रहेको छ । एसियन एथलेटिक्समा सोमसँगै नेपाल एपीएफ क्लबका अजित कुमार यादव पनि दोहा जाँदैछन् ।

आठौं नखेल्ने भएपछि सोमले आठौं खेलकुद मिस हुने भएपनि एसियनमा आफ्नो रेकर्डमा सुधार गर्ने बताए । ‘यो वर्ष नियमित (दुईवर्षको अन्तर) मै प्रतियोगिता आयोजना भयो । हामी खुशी थियौं । तर, एसियन र आठौंको मिति जुधेपछि आठौं नखेल्ने भएँ, ‘सोमले भने ।

सोम ट्र्याक एन्ड फिल्डका ४००, ८०० र १५०० मिटरको च्याम्पियन हो । उनी सातौंका समेत च्याम्पियन हुन् । सोमले आठौंमा ४००, ८००, १५०० र ४ गुणा १०० मिटर रिलेमा प्रतिस्पर्धा गर्ने तालिका थियो । सोमसँगै नेपाल एपीएफ क्लबका अजित कुमार यादवले कतारको दोहामा आयोजना हुने एशियन एथलेटिक्स च्याम्पियनसिपमा प्रतिस्पर्धा गर्ने भएका छन् ।

गत महिना हङकङमा भएको तेश्रो एसियाली युथ एथलेटिक्स च्याम्पियनसिपका स्वर्णधारी अजितले ५ हजार मिटर दौडमा नेपालको चुनौती पेश गर्नेछन् । यस्तै कीर्तिमानी खेलाडी सोमबहादुर कुमालले ८ सय र १५ सय मिटर दौडमा प्रतिस्पर्धा गर्नेछन् ।

नेपाल एथ्लेटिक्स संघले दोहामा अप्रिल २१ देखि २४ तारिखसम्म आयोजना हुने च्याम्पियनसिपका लागि नेपालबाट सोमबहादुर कुमाल र अजित कुमार यादवले प्रतिस्पर्धा गर्ने जनाएको छ ।

कुमालले गत भदौमा इन्डोनेसियामा भएको १८ औं एसियाली खेलकुदमा सोमबहादुर कुमालले १ मिनेट ५०.२५ सेकेन्डमा ८ सय मिटर दौड पूरा गर्दै आफ्ना गुरु धनीराम चौधरीको कीर्तिमान भंग गरेका थिए ।