काठमाडौं (हाम्रो खेलकुद) – पाँचौ केएनपी राष्ट्रिय महिला भलिबल प्रतियोगितालाई मुत्तिनाथ बिकास बैंकले प्रायोजन गरेको छ ।

आयोजक शेर बहादुर खड्का स्मृति प्रतिष्ठानले आज काठमाडौंमा एक पत्रकार सम्मेलन गर्दै प्रतियोगिताको विजेताको लागि मुक्तिनाथ बिकास बैंकसँग प्रायोजन सम्झौता गरेको हो । सम्झौतामा मुक्तनाथ बिकास बैंका सिइओ प्रद्युमान पोखरेल र शेरबाहदुर खड्का स्मृति प्रतिष्ठानकी संरक्षक गमली खड्काले सम्झौता पत्र आदान प्रदान गरे । सम्झौतापछि बैंकका सिइओ प्रद्युमानले राम्रो क्षेत्रमा हात हालेका कारण सुरुमा सानो रकमबाट अघि बढेको र बिस्तारै सहयोग बढ्दै जाने बताए ।

सम्झौतासँगै बैंकले प्रथम पुरस्कारको २ लाख रुपैयाँसहित आवश्यक होडिङ बोर्ड र ब्यानरको व्यवस्था मिलाउनेछ । जावलाखेलस्थित भलिबल कोर्टमा हुने प्रतियोगिताको विजेताले २ लाख, उप विजेताले १ र तेस्रो हुने टोलीले रु ५० हजार प्राप्त गर्ने छन् । प्रतियोगिताको सर्वोकृष्ट खेलाडी र शेर बहादुर स्पेशल अवार्डको विजेताले जनही रु १५–१५ हजार पाउने छन् । त्यस्तै विधागततर्फ उत्कृष्ट स्काईकर, उत्कृष्ट सेटर, उत्कृष्ट ब्लक, उत्कृष्ट डिफेन्स, उत्कृष्ट सर्भर र उत्कृष्ट प्रशिक्षक जनही ५ हजार प्राप्त गर्नेछ ।

त्यस्तै प्रतियोगिताको प्रत्येक खेलको वुमन अफ द म्याचले पनि नगद ५ हजार र ट्रफी पाउने छन् । प्रतियोगिताको सर्वोत्कृष्ट खेलाडी र शेर ब. खड्का स्पेशल अवार्डको विजेताले सुलक्स सेन्टरबाट ३०–३० हजार बराबरको टिसट घडी पनि पाउने प्रतिष्ठानले जनाएको छ । प्रतियोगिताको अनुमानित लागत २१ लाख रुपैयाँ रहेको छ ।

प्रतियोगिताको मुख्य प्रयोजकको रुपमा जापानको नम्बर वान पेन्ट बहुराष्ट्रिय कम्पनी केएनपी रहने छ । प्रतियोगितामा साविक विजेता एपिएफ, होङवान्जी न्युडायमन्ड, नेपाल पुलिस, आर्मी, पश्चिमाञ्चल भलिबल संघ र जावलाखेल भलिबल प्रशिक्षण केन्द्र गरि ६ टिमको सहभागिता रहने छ । प्रतियोगिता लिग कम नकआउटको आधारमा सञ्चालन हुने छ ।