एजेन्सी – ओपनरद्वय डेविड वार्नर र जोनी बेयरस्टोले आक्रामक शतक जोडेपछि इन्डियन प्रिमियर लिग अन्तर्गत ११ औं खेलमा सनराइजर्स हैदराबादले रोयल च्यालेंजर्सलाई २ सय ३२ रनको विशाल लक्ष्य दिएको छ ।

राजीव गान्धी इन्टरनेशनल स्टेडियमा टस हारेर पहिला ब्याटिङ थालेको घरेलु टोली हैदरावादले निर्धारित २० ओभरमा २ विकेटको क्षतिमा २ सय ३१ रन बनायो । यो हैदरावादले बनाएको अहिले सम्मकै उच्च स्कोर सम्म हो ।

हैदरावादलाई विशाल योगफल तयार पार्न ओपनर जोनी बेयरस्टोे आफ्नो आईपीएल करियरको तेस्रो खेलमै पहिलो सानदार शतक प्रहार गर्दै १ सय १४ रनमा क्याच आउट भए । सुरुवात देखीनै मैदानमा चौका र छक्काको वर्षा गराएका बेयरस्टोले ५६ बलमा १२ चौका र ७ छक्का प्रहार गरे । बेयरस्टोले ५२ बलमा शतक पुरा गरेका थिए ।

त्यस्तै अर्का ओपनर डेविड वार्नरले पनि सानदार शतक प्रहार गरे । वार्नर १ सय रनमा अविजित रहे । २० ओभरको चौथो बलमा मोहम्मद सिराजलाई चौका हान्दै ५४ बलमा शतक प्रहार गरेका वार्नरको यो आईपीएल करियमा चौथो शतक हो ।

वार्नरले ५५ बलमा समान ५ चौका र छक्का प्रहार गरे । यी दुई ओपनरले पहिलो विकेटका लागि १ सय ८५ रनको कीर्तिमानी गरका थिए । पहिलो विकेटका यो आईपीएलमा अहिले सम्मकै उच्च साझेदारी समेत हो ।

यी दुईको साझेदारी १७ ओभरको दोस्रो बलमा युजवेन्द्र चाहलले बेयरस्टोलाई उमेश यादवबाट क्याच गराउँदै तोडेका थिए । विजय शंकर ९ रनमा रन आउट हुँदा युसुफ पठान ६ रनमा अविजित रहे । बेंगलोरका लागि युजवेन्द्र चाहालले १ विकेट लिन बाहेक अन्य कुनै पनि बलरले विकेट लिन सकेनन् ।