एपीएफ र न्यु डायमन्ड विजयी

काठमाडौं (हाम्रो खेलकुद) – राजधानीमा सोमबारबाट शुरु भएको सशस्त्र प्रहरी महानिरीक्षक छैठौं राष्ट्रिय खुुल्ला महिला भलिबल प्रतियोगितामा उपाधिको दावेदार विभागीय नेपाल एपीएफ क्लब र होङग्वान्जी न्यु डायमन्ड एकेडेमीले विजयी शुरुवात गरेको छ ।

हल्चोकस्थित एपीएफको भलिबल कोर्टमा सोमबार भएको खेलमा नेपाल एपीएफ क्लवले अर्काे विभागीय टोली त्रिभुवन आर्मी क्लवलाई ३–० को सोझो सेटमा पराजित गर्दै विजयी शुरुवात गरेको हो । एकपक्षीय खेलमा एपीएफले पहिलो सेट २५–१७ ले सहजै आफ्नो बनाएको थियो । दोस्रो सेट २५–१३ ले जित्दा तेस्रो सेट एपीएफले २५–२० ले सहजै जित्न सफल भयो ।

सोमबारै भएको अर्काे खेलमा होङग्वान्जी न्यु डायमन्डले विभागीय नेपाल पुलिस क्लबलाई ३–१ ले हरायो । प्रतिस्पर्धात्मक बनेको पहिलो सेटमा डायमन्ड २५–२३ ले विजयी भएको थियो । दोस्रो सेट भने डायमन्डले १४–२५ ले गुमायो । तर, त्यसपछिको दुवै सेट डायमन्डले २५–१५ र २५–१५ ले पराजित गर्न सफल भयो ।