काठमाडौं (हाम्रो खेलकुद) – भुवनकुमार रोक्काले सूर्य नेपाल च्यालेन्जको दोस्रो दिन समग्रमा १ स्ट्रोकको अग्रता लिएका छन् । बुधबारको खेलमा ३ अन्डर ६५ जोडेका भुवनले समग्रमा ४ अन्डर १ सय ३२ अंकसहित शीर्षस्थान कब्जा गरेका हुन् ।

दोस्रो स्थानमा ३ अन्डर १ सय ३३ जोडेका एमेच्योर सुवास तामाङ रहेका छन् । सुवासले दोस्रो सिङ २ अन्डर ६६ स्कोर जोडे । तेस्रो स्थानमा दीपक मगरले इभन पार ६८ सहित १ अन्डर १ सय ३५ बनाएका छन् । संयुक्त चौथो स्थानमा ६ खेलाडीले समान इभन पार १ सय ३६ स्कोर जोडेका छन् । जयराम श्रेष्ठ, रामे मगर, प्रदिपकुमार लामा, रवी खड्का र सूर्यप्रसाद शर्मासँगै एमेच्योर विनोद तामाङ शीर्ष ९ मा रहेका छन् ।

दशौँ स्थानमा अघिल्लो दिन शीर्षस्थानमा रहेका संजय लामाले समग्रमा १ ओबह्र १ सय ३७ स्कोर जोडेका छन् । उनले दोस्रो दिन ३ ओभर ७१ स्कोर जोडे । प्रतियोगितामा ३३ व्यावसायिक र ९ एमेच्योरसहित ४२ गल्फरको सहभागिता रहेको छ । शीर्ष २१ व्यावसायिक र शीर्ष ६ एमेच्योरले अन्तिम दुई दिनका लागि कट बनाएका छन् ।

प्रतियोगिताको कुल पुरस्कार राशी ४ लाख ४१ हजार रुपैयाँ रहेको छ । विजेताले ८४ हजार रुपैयाँ प्राप्त गर्दा उपविजेताले ५३ हजार र तेस्रो स्थान हासिल गर्नेले ३७ हजार प्राप्त गर्नेछन् । शीर्ष २१ व्यावसायिक गल्फरले नगद पुरस्कार पाउनेछन् ।