एजेन्सी – न्युजिल्यान्डसँगको तीन टि-२० श्रृंखला अन्तर्गत पहिलो खेलमा पाहुना टोली भारत ८० रनको फराकिलो अन्तरले पराजित भएको छ ।

न्युजिल्यान्डले प्रस्तुत गरेको २ सय २० रनको विशाल लक्ष्य पछ्याउने क्रममा भारत ४ बल बाँकी रहँदा १ सय ३९ रनमा अल आउट भयो । भारतका लागि महेन्द्रसिंह धोनीले ३१ बलमा ५ चौका र १ छक्का प्रहार गर्दै सर्वाधिक ३९ रन बनाए । शिखर धवन २९, विजय शंकर २७, क्रुनाल पान्ड्याले २०, कप्तान रोहित शर्मा १, दिनेश कार्तिक ५ तथा ऋषव पन्त र हार्दिक पान्ड्याले समान ४ रनमा आउट भए ।

भारतलाई सस्तैमा रोक्न तिब्र गतिका बलर टिम साउथीले घातक बलिङ गरे । साउथीले ४ ओभरमा १७ रन खर्चेर ३ विकेट लिए । त्यस्तै मिचेल सेन्टनर, इश सोधी र लकी फर्गुसनको नाममा समान २-२ र डेरिल मिचेलले १ विकेट लिए ।

त्यसअघि टस हारेर पहिला ब्याटिङ थालेको घरेलु टोली न्युजिल्यान्डले २० ओभरमा ६ विकेटको क्षतिमा २ सय १९ रन बनाएको थियो । उसका लागि ओपनर टिम सीफर्ट र कोलिन मुनरोले पहिलो विकेटका लागि ८६ रनको साझेदारी गर्दै बलियो सुरुवात दिएका थिए । आक्रमक ब्याटिङ गरेका सिफर्टले ४३ बलमा ७ चौका र ६ छक्का प्रहार गर्दै ८४ रन बनाए । कोलिन मुनरो र कप्तान केन विलियम्सनले समान ३४ रन जोडे ।

त्यस्तै डेरिल मिचेल ८ र रोश टेलरले २३ रनको योगदान दिए । मिचेल सेन्टनर ७ र स्कर्ट कुग्गेलेइजन २० रनमा अविजित रहे । भारतका लागि हार्दिक पान्ड्याले ४ ओभरमा ५१ रन खर्चेर २ विकेट लिए । क्रुनाल पान्ड्या, भुवनेश्वर कुमार, खलिल अहमद र युजवेन्द्र चाहालको नाममा १ विकेट रह्यो ।

यो जितसँगै न्युजिल्यान्डले तीन टि–२० श्रृंखलामा १ – ० को अग्रता लिएके छ । दोस्रो खेल आगमी शुक्रबार हुने छ । पाँच वान डे श्रृंखला ४ –१ ले गुमाएको न्युजिल्यान्डलाई टि–२० सिरीज जित्नै पर्ने दवाव छ ।