काठमाडौं (हाम्रो खेलकुद) – नेपालले ३४ औ संस्करणको बंगलादेश एमेच्योर गल्फ च्याम्पियनसिपको टिम ईभेन्टसमा स्वर्ण पदक जितेको छ।

कुर्मितोला गल्फ क्लबमा बुधबार नेपालका शीर्ष दुई एमेच्योर गल्फर शुक्रबहादुर राई र टंकबहादुर कार्कीको नेपाल ए ले कुल १२ ओभर ३०० स्कोरकासाथ बंगलादेशको बी टिमलाई ३ स्ट्रोकले हराउँदै स्वर्ण जितेको हो। बंगलादेशको बी टिम ३०३ स्कोर सहित दोस्रो र ३०७ स्कोर जोडी बंगलादेशको बी टिम तेस्रो भएका छन ।

दोस्रो चरणको खेलमा टंकले १ ओभर ७३ र शुक्रले ३ ओभर ७५ अंक बनाएसँगै ४ ओभर १४८ को नतिजा निकाल्दै नेपाल स्वर्णको हकदार बनेको हो । पहिलो चरणमा दुवैले ४ ओभर ७६ अंक जोडदा नेपाल दोस्रो स्थानमा थियो । युवा खेलाडी सुवास तामाङ र युवराज भुजेलको नेपाल बी टिम ३३१ अंक सहित छैटौ भए । टिम स्पर्धामा कुल दश टिमको सहभागिता रहेको थियो ।

व्यक्तिगतर्फ युवराज भुजेल बाहेक अन्य चार नेपाली खेलाडीले कट बनाएका छन् । टंक कुल ४ ओभर १४९ को नतिजामा तेस्रो स्थानमा रहँदा लिडर बंगलादेशका सफिक भागा भन्दा ४ स्ट्रोकले पछाडि छन् । सफिक ईभन पार ७२ सहित दोस्रो चरणको समाप्तिमा कुल १ ओभर १ सय ४५ अंक कोस्थितिमा छन् । ३ ओभर १४७ अंक बनाएका पाकिस्तानका अहमद बेग दोस्रो स्थानमा छन् ।

शुक्रबहादुर राई ६ ओभर १ सय ५० अंक सहित छैटौं र सुबास तामाङ १ सय ५४ अंक सहित दशौं स्थानमा रहेका छन् । ग्रसतर्फ टासी घलेले पनि कट बनाए । उनले बुधबार ६ ओभर ७८ र पहिलो दिन ८७ स्कोर गरेका थिए । कट बनाउन नसकेका युवराज भुजेलले ३३ ओभर १७७ अंक बनाए ।