पोखरा (हाम्रो खेलकुद) – विभागीय नेपाल पुलिस क्लब पोखरामा आजबाट शुरु भएको दोस्रो सभामुख कप राष्ट्रिय महिला भलिबल प्रतियोगिताको समूह विजेताको रुपमा क्वाटरफाइनलमा प्रवेश गरेको छ ।

समूह ‘डी’ मा रहेको पुलिसले गण्डकी प्रदेशमाथि ३–० को सोझो सेटमा जित निकाल्दै समूह विजेताको रुपमा अन्तिम आठमा पुग्न सफल भएको हो । पुलिससँग पराजित भएपनि गण्डकीले समूह उपविजेताको रुपमा अन्तिम आठमा पुग्न सफल भयो ।

पोखरास्थित पोखरा रंगशालाको भलिबल कोर्टमा मंगलबार भएको खेलमा पुलिसले पहिलो सेटमा २५–१९ ले जितेको थियो । दोस्रो सेटमा २५–२० को जित निकालेको पुलिसले तेस्रो सेट २५–१७ ले सहजै आफ्नो पक्षमा पार्न सफल भयो ।

प्रतियोगितामा मंगलबारै भएको अर्काे खेलमा प्रदेश ३ ले विभागीय त्रिभुवन आर्मी क्लबलाई ३–१ को सेटमा पराजित गर्दै क्वाटरफाइनलमा पुग्न सफल हुदा आर्मी समूह ‘सी’ को उपविजेताको रुपमा अन्तिम आठमा पुग्न सफल भयो ।

मंगलबार नै साविकको विजेता नेपाल एपिएफ क्लबले प्रदेश १ माथि २५–३, २५–८ र २५–३ को सहज जित निकालेको थियो । मंगलबारै भएको दोस्रो खेलमा प्रदेश नम्वर ५ ले प्रदेश नम्वर २ माथि २५–१०, २५–१४ र २५–८ ले पराजित गर्दै विजयी सुरुवात गरेको छ ।

प्रतियोगितामा तीन विभागीय टोली र ७ प्रदेश गरी १० टोलीको सहभागिता रहेको छ । सहभागी टोलीलाई चार समूहमा विभाजन गरिएको छ । समूह ‘ए’ मा एपिएफ, प्रदेश १ र सुदुरपश्चिम प्रदेश रहेको छ । समूह ‘बी’ मा प्रदेश ५, प्रदेश २ र कर्णली प्रदेश रहेको छ । समूह ‘सी’ मा आर्मी र प्रदेश तीन तथा समूह ‘डी’ मा नेपाल पुलिस क्लब र गण्डकी प्रदेश रहेको छ । हरेक समूहका शीर्ष दुई टोलीले क्वाटरफाइनलमा स्थान बनाउनेछ । प्रतियोगिता माघ ५ गतेसम्म सञ्चालन हुनेछ ।

प्रतियोगिताको विजेताले ३ लाख ५० हजार रुपैया हात पार्नेछन् । उपविजेताले १ लाख ७० हजार, तेश्रोले १ लाख र चौथो हुनेले ५० हजार रुपैया हात पार्नेछन् । प्रतियोगिताको सर्वाेत्कृष्ट खेलाडीले १० हजार रुपैया हात पाउने छिन् । विधागत उत्कृष्टतर्फ स्पाईकर, ब्लकर, सर्भर, सेटर, लिवेरो र प्रशिक्षकले जनही ५–५ हजार रुपैयाँ हात पार्नेछन् ।

प्रतियोगिता अन्तरगत बुधबार लिगका चार खेल हुनेछ । पहिलो खेलमा प्रदेश १ र सुदुरपश्चिम प्रदेश, दोस्रो खेलमा प्रदेश २ र कर्णाली प्रदेश, तेस्रो खेलमा नेपाल एपिएफ क्लब र सुदुरपश्चिम प्रदेश र चौथो खेलमा प्रदेश ५ र कर्णाली प्रदेशबीच खेल हुनेछ ।