पोखरा (हाम्रो खेलकुद) – प्रदेश नम्वर ३ दोस्रो सभामुख कप राष्ट्रिय महिला भलिबल प्रतियोगिताको समूह ‘सी’ को विजेताको रुपमा क्वाटरफाइनलमा प्रवेश गर्न सफल भएको छ ।

पोखरा रंगशालास्थित भलिबल कोर्टमा मंगलबार भएको खेलमा प्रदेश नम्वर ३ ले विभागीय त्रिभुवन आर्मी क्लबलाई ३–१ को सेटमा पराजित गर्दै अन्तिम आठमा पुगन सफल भएको हो ।
पराजित भएर पनि आर्मी उपविजेताको रुपमा अन्तिम आठमा पुग्न सफल भयो ।

अधिकांश न्यु डायमन्डका खेलाडी सम्मिलित प्रदेश ३ ले पहिलो सेटमा २५–१० को सहज जित निकालेको थियो । दोस्रो सेट भने प्रदेश ३ ले १२–२५ ले गुमाएको थियो । तर, त्यसपछिको दुवै सेट प्रदेश ३ ले २५–२० र २५–१४ ले आफ्नो पक्षमा पार्न सफल भयो । आजै समूह ‘डी’ को खेलमा आयोजक गन्डकी प्रदेश र विभागीय नेपाल पुलिस क्लबबीच खेल हुदैछ ।

आइतबारै भएको अर्काे खेलमा साविकको विजेता नेपाल एपिएफ क्लबले प्रदेश १ माथि २५–३, २५–८ र २५–३ को सहज जित निकालेको थियो । मंगलबारै भएको दोस्रो खेलमा प्रदेश नम्वर ५ ले प्रदेश नम्वर २ माथि २५–१०, २५–१४ र २५–८ ले पराजित गर्दै विजयी सुरुवात गरेको छ ।
प्रतियोगितामा तीन विभागीय टोली र ७ प्रदेश गरी १० टोलीको सहभागिता रहेको छ । सहभागी टोलीलाई चार समूहमा विभाजन गरिएको छ ।
समूह ‘ए’ मा एपिएफ, प्रदेश १ र सुदुरपश्चिम प्रदेश रहेको छ । समूह ‘बी’ मा प्रदेश ५, प्रदेश २ र कर्णली प्रदेश रहेको छ । समूह ‘सी’ मा आर्मी र प्रदेश तीन तथा समूह ‘डी’ मा नेपाल पुलिस क्लब र गण्डकी प्रदेश रहेको छ । हरेक समूहका शीर्ष दुई टोलीले क्वाटरफाइनलमा स्थान बनाउनेछ । प्रतियोगिता माघ ५ गतेसम्म सञ्चालन हुनेछ ।
प्रतियोगिताको विजेताले ३ लाख ५० हजार रुपैया हात पार्नेछन् । उपविजेताले १ लाख ७० हजार, तेश्रोले १ लाख र चौथो हुनेले ५० हजार रुपैया हात पार्नेछन् । प्रतियोगिताको सर्वाेत्कृष्ट खेलाडीले १० हजार रुपैया हात पार्नेछ । व्यक्तिगत विधातर्फका बेष्ट स्पाईकर, बेष्ट ब्लकर, बेष्ट सर्भर, बेष्ट सेटर, बेष्ट लिवेरो र वेष्ट प्रशिक्षकले जनही ५–५ हजार रुपैया हात पार्नेछन् ।